Aung San Milem Thantlang Um A Duh Lotu Nih Ruahnak Raal An Doh Ti Kan i Fian A Herh!

Chin ram ah a rak um balmi Kawl siangcachimnu nih duh a nung takmi Lai ngakchia nute a hmuh i, “Aa, nute cu Kawl mui na keng, naa dawh ning cu Kawl dawh in naa dawh,” a ti. Cu a lungput cu aa uah theng ruangah a si lo, ruahnak in miphun sang bik an sinak le teitu an sinak kha a langhter. Kawl nu nakin Lai nu aa dawh deuh timi kha a dikmi a si zong ah a ruahnak nih a cohlang duh lo. Mah cucu miphun tling le miphun saang sinak raaldoh a si, ruahnak raaldoh a si. Kawl nu nih a lungput in Lai miphun a kan tei diam cang tinak khi a si.

Lungput in i tei hmasat a herh. Lai nih Kawl lungput cu kan tei kho rih lo caah an tangah kan kun peng ko lai, an kan hlen peng ko lai. Hlen ngaingai zong khi a si lo, an lungput in an kan tei caah an kan tei hrimhrim. Mah cucu kan hrawh a hau.

Vai raalkaap nih Mizo raalkaap an rak tlaih i, an kahthah lai ah Mizo pa nih, “Vai chia kahthah meimei zei ah ka rel lo,” tiin a cil a chaakhnawh hna. Mizo nih Vai pawl hi an lungput in pei an rak ngamh tuk, an rak tei tuk hna cu, hriamnaam in cun an tei nemmam hna lo. Lungput in i teinak hi hriam zong nih a donghnak ahcun a ngamh tawn lo.

Thantlang khua chung lamlianpi ah Aung San milem a dir lai, upat-philhlonak tuanbia ah kan ti. Tuanbia cu ngakchia ca an si. An hmuh khawh taak ah thil lianngan bik pakhat a si lai caah an nulepa sinah biahalnak phunphun an ngei lai i, Aung San  sining an theih tawk an chimh hna lai, a donghnak ah Kawl pa a si kha an theih lai. Kawl pei an pical bik hi timi ruahnak an lung ah a riak lai. Cu tikah upat-philhlonak tuanbia tiah kan ruahmi cu Lai ngakchia nih Kawl miphun cu Lai miphun nakin an sang deuh timi lungput le ruahnak  ngeihtertu ah a cang lai.

Lai mi nih Kawl miphun hi lunghrinh lo awk an ttha lo. Ruahnak ah an kan teimi hrimhrim hi duh lo awk a si, kan ruahning mer ve a hau. Ramthumnak ummi nih Mirang ram zongah cu milem kha milem an tuah ko, cukha kan ti, an ram ahcun a poi lo, Mirang ram le Chin ram ai lo lo. Annih cu an ruahnak le lungput a sang tuk cang. An inn chungah Hitler milem lianpi in an chiah zong ah an ruahnak nih German miphun teinak an ngei cang.

Aung San milem Thantlang um dingmi hi a doh in doh ding zong a si lo, a duh in duh lo men ding a si ko. Chiah a si zongah Chin mi pa ralttha pawl milem nakin fa deuh in, hmunkhat ah chia usihlaw Kawl mi nih an hmuh tikah lau hna seh. Ziah Aungsan milem cu ngan deuhin nan umter lo an ti tikah ‘kan ram ahcun Lai pa ralttha pawl hi an ngan deuh’ ti men ding a si ko. Cu bantuk tete cu ruahnak-lungput ah i tei ning a si.

Mah bantuk ruahnak hi kan ngeih tikah mi phundang huat khi a si ngaingai maw, Kawl miphun doh khi a si ngaingai maw? A si lo, kan lungput tthanchonak lam i kawl a si. Aung San milem kha kan duh lo in kan doh ngaingai khi a si maw? A si lo. Kawl nih kan ruahnak an kan tlaihhremmi hi hlohthlau kan i zuamnak men a si. Aung San milem nih cu bantuk ngaingai in kan ruahnak a kan ttemttawn hnga maw nan ti men lai nain nan theih ve ttung lo. Ruahnak ah i teinak hi thil hme tete in pei ai thok ve cu.

100% mawtaw khalh a thiam vevemi Kawl pa le Lai pa karlak hmanh ah Lai pa a thiam deuh tiin ttan ding a si, lung chung in mu, i nehsawh lo in. Ruahnak raal kan doh ta a hau, dawhcahlo deuh zong khi va si rih ko seh, ruahnak in kan tluk ve hna, kan tei ve hna a herh.

Note: Mah le ruahnak cio,