Australia Auhnak Kong Ah Theih Herh Mi

Miphun hawi sinah siaherhnak he thil thlennawn mi a um caah ka van ttial tthan. Cuhlan ah cun chungkhat nih maw, unau le nulepa tibantuk nih Malaysia le New Delhi um kan unau lak kan duh hna tikah laknak form fawizaang tein online (maivan) ah hmuh khawh le lak khawh a si.

A fawinak in chim ahcun “842 form” ti’n na google ahcun PDF file in an chiah cia mi hmuh khawh colh, download tuah colh khawh a si. Cu bantuk tthiamtthiam in koautu (proposer) nih phit (fill up) awk form 681 zong online (maivan) fawite in lakchuah le hmuh khawh a rak si. Sinain tu ahcun Australia Cozah website an remh lio si caah hmuh khawh colh a si ti lo. Cucaah a tanglei ah a laknak ka langhter lai.

Australia Cozah nih Subclass 202, Global Special Humanitarian Visa (GSH) visa hi naicikua taktak te ah Department of Home Affairs kut tang ah a chiah. Cucaah Home Affairs nih visa(s) kong le zeimaw Australia ram chung khuasak nuncan ning (life style) kong chimfiannak ah a hmanmi website hi mah hi link hi a si (https://archive.homeaffairs.gov.au/trav/visa-1/202-…).

Caan zeimawzat chung an hman hnu ah siamremh an duh, an remh cuahmah lio a si. Cucaah chungkhat kawhauhnak tuah kan duh tikah kan phit mi “form-842 le 861” cuhlan bantuk in langsar ah an chia ti lo i google in van kawl tikah a cuang ti lo. Cucaah form phit a duh mi hna nih link ka thilmi khi nan hmehpiak lai i Home Affairs website a cuang lai.

Global Special Humanitarian Visa (Subclass 202) tiah cafang lianpi a rak cuang lai. Mah na hmuh cun atanglei ah na mit na chiahpiak lai i (About this visa, Visa Applicants, Visa Holders, Proposers) tiah artlang in a ttial mi na hmuh lai. Mah na hmuhmi chungah “Visa Applicants” timi khan a hmehpiak lai i kan rak phit catlang paruk (6) na hmuh tthan lai. Cu chungah a pathumnak “How to Apply” timi kha na hmehpiak tthan lai i “202 visa in i kawhauhnak form (842 le 681) cu tukum 2018 ca ah an pom ciami PDF file in na hmuh lai.

Tulio unau hna dirhmun in 202 visa lawng hi ruahchannak umchun a si caah, tuah a duh ko nain form a um ti lo, tuah a ngah ti lo tiah a ruatmi nan um sual lai ti ruah caah, siaherhnak he ka van ttial mi a si. Palhnak le tlamtlinlonak a um ahcun toidornak he nan ka ruahthiam naklai zong kan nawl chih hna. Cun lungfian lomi nan um ahcun keimah pumpak zong hal khawh ka si.

CREDIT: CARSON TIN TWIN OO