Biak Inn I Ai Pum Deuh Mi Paoh Cu An Nun Khua A Sau Deuh

Khrihfa mi nih kan thlarau rawl cu Bible hi a si , kan lungre theih caan, ngeihchiat caan, thlarau leiin kan thazaang a der caan le dam lo caan i hna ngamnak a kan pe tu bik cu Pathian bia Bible hi a si. Bibile nih a chimmi paoh cu a palh bal lo, a hman peng. Pathian bia nih a kan fial mi cu ” Pakhat le pakhat hmunkhat i i pumh lengmang kha ngol hlah usih; a cheu nih cun ngol hmanh hna sehlaw, kan nih cu i forh chin ko usih…..( Heb 10: 25) tiah Bible nih a kan chimh.

Vanderbilt University nih research an tuah mi ah khuaruah har in thil pakhat an hmuh khawh. A caan hman tein Pathian biakinn ah ai pum peng mi cu ai pum bal lomi pawl nakin an nun khua a sau tiah an hmuh chuah. Kum 40 in 65 karlak minung , a caan hman tein biakinn ah ai pum lengmang mi cu an thlarau lei thazaang a tthawn lawng siloin an taksa hrimhrim a tthawng deuh i an ngan dam deuh. Kum 40 in a tanglei minung , a caan hman tein biakinn ah ai pum lengmang mi zong an lungre theihnak, hna bei donghnak le pumsa duhnak an rak ngeih mi kha 55 % bak in a zor deuh, cu tikah an nun khua zong a sau deuh tiah Associate Professor of Medicine, Health and Society i Professor Marino Bruce nih a chim.

Biakinn lam zong a panh ballo mi hna hi a caan hman tein biakinn ah a kal lengmang mi nakin an thih a tuan deuh i an kum a tlin hlanah a thimi zong an tam deuh tiah Research a tuah mi pawl nih an hmuh chuah. Biakinn a kal lengmang mi minung 5000 tluk sinah research an tuah, an hmuh chuah mi hi khuaruah har ngai zong asi. Zeiruang ahdah biakinn a kal lengmang minung pawl hi an ngan a dam deuh i a taksa thazaang zong a tthawn deuh ti ahcun an hmuh lei nakin an pek lei ahhin a si deuh. Minung pakhat nih siang tein mi pakhat kha thil a pek tikah a pekmi pa nakin a pe tu kha ai lawm deuh tawn. Lunglomhnak nih taksa caah rian tampi a ttuan, cu lomhnak nih cun nun khua tiang a sau ter tiah Professor Bruce nih a chim.

Hi thil kan hmuh chuah mi hi Khrihfa ca lawngah a si lo, biaknak a ngeimi dihlak caah a si.  Biakinn lam zong a panh ballo mi minung cu lungretheih nak nih a den hna, an hna bei dongh a foi, sual duhnak thinlung an ngei peng, cu tikah mah le mah thah duhnak thilung tiang an ngei i an chan a tawi. An biaknak cio ah a caan hman tein ai pum deuh mi cu an lungre theihnak a zor, hna bei donghnak an ngeih mi a zor i sual duhnak lungthin an ngeih mi zong a zor, ai pum ballo mi pawl nak in an lung ai lawm deuh i cu an i lawmhnak nih cun an nun khua tiang a sau ter tiah Bruce nih a chimchap. Cu caah Pakhat le pakhat hmun khat i i pumh lengmang kha ngol hlah usih; a cheu nih cun ngol hmanh hna sehlaw, kan nih cu i forh chin ko usih……Pathian biakinn kal lengmang le pumh lengmang cu nun khua saunak a si.

Ref: CBN

 

Be the first to comment

Leave a Reply

Your email address will not be published.


*