Chin Zumtu Kawl Titoih Puai Hmannak Nih Chinram Le Miphun Thluachuah Inka A Khar Khawh!

‘THINGYA’   Kawl titoih puai hi a sullam kan theih viarmi a si nain anmah bantukin kan hman ve awk a si lo timi bel kan i fiang lo a bang.   An biaknak he ai tlai bakmi a si,   thingyan cu   ‘thlen’ tinak  a si.   India Hinduism in Kawl ram Buddhism ah a rami a si.  Hindu biakmi Indra   le   Buddhist biakmi deva Sakra an biak pathian puai a si. An puai hmannak nih ai tinhmi cu thlen a si,   kum hlun   i   sualnak le tthatlonak  vialte kha tii in thianter biaknak a si. Kan pathian cu a thlarau sinak ram in a hung ra i,   a kan zoh tiin an ruah. Cucaah, tthatnak tuah an i zuam.    Phungki sinah an kun, laksawng an pek,    nulepa le kum upa zahnak an langhter. Rawl an i dangh,    a phunphun in tthatnak an tuah.

A sullam le vei cu va um cang ko seh, Buddhist ram nih cun an tuah viarmi a si, an min le tuahning tete lawng ai dang. Cucaah, biaknak thil a si. Nai va tel ve, nai va lawmh ve ah khin Buddhist cu ka si lem lo hme cu, zeidah a poi,    an pathian cu ka biak ve ttung lo na ti men lai nain puai   a   si tikah nuamhnak phuntling an um.    Cu lak i nai va ciah ve ahcun na lungthin na pek tengteng, na ruahnak na pek lai i, nuam ngang in na turcawl ve lai.

Khi an puai chung i na lungthin le ruahnak na pekmi te zong khi Pathian nih a zoh kho bak lo,   a nah a chuak, Pathian cu nahchuak hmang Pathian a si kha philh hlah. A thimmi a miphun Judah mi zong mah bantuk ruangah hin hnunglei a chittaak lengmang hna.

Cucaah Kawl ram ah a ummi  Chin mi nih kutsih in hei zoh sawh ko ding nan  i  va nuamh thulh ve lengmang ahcun Chin ram Pathian  a lung a tling lai lo i,  hnunglei A kan chittaak  lai. A hnunglei A kan chittaak ahcun nanmah sualpalh a si lai.  Nanmah ruangah kan  Chin ram  le  miphun  cungah  Pathian lunglawmh lonak a um kho.    Pathian  cu  a  miphun sin i aa lawmh lo tikah lam khatkhat in mi hrem a hmang. Cucu A kan dawt ruangah a si.

Pumpaak thil lawng a si lo, miphun thil zong a si. Hi thil hi Chin miphun he aa naihmi a si caah ttih a nung bakmi pakhat a si. Kawlram chungah Chin miphun hi a um ko nain kan ruahnak le lungthin cu ai dang. Mah cucu ‘a poinak a um set hme maw?’ ti sawhsawh ding a si lo. Thlarau a simi kan biak Pathian ruah ning le cawlcangh ning ai dang. Tii vai toihhnawh i, va aukhuan le turcawl lawng khi a si lo! Minung raal a simi Satan fimnak pakhat a si: Tlawmpal nunnak tal ka laak khawh ah ti men khi a si, a zei sual thianh nemmam cu.

Va turcawl ve nakcun sual thianternak taktak a simi Thawngttha Bia phuannak caam rem tu ah Chin mi nih cun kan hman deuh awk a si.