Fa Sual Kan Ngeihnak A Ruang

Fasual kan ngaihnak a ruang hi tampi a um lai. Cu lakah a ruang pakhat chim ka duhmi ka hun chim ve lai.

Siizung ah midamlo kan umpi hna caan ko ah hin, zeiruang ah dah buai ngai in rian kan ṭuan caan nakin kuva, kuak le khaini kan hlam in kan ei, kan zuk, kan hmawm khun hnga? A ruang bik cu tuah awk ngaingai a um lo i, ei kan hiar tuk ruang zongah si loin ei ding, hmawm ding le tuah ding kan kawl tawn ruangah a si. Cucu minung zia a si ve ko.

A cunglei bantuk khin ngakchia sual tampi hna hi tuah awk hngalh loin a um sawhsawhmi an tam tuk ruangah a si ve.

Kan hnuah zongah khan kan hawipa pakhat sinah, “Zu na din lengmangmi hi a thaw na ti tuk ruangah si loin, tuah awk hngal loin nai manh tuk ruangah a si lo maw?” ka ti i, a dik a ti ngaingai ve!

Hihi zeitindah kan hloh lai kan ti ahcun:

1. Kan fale cu boarding ṭhaṭha i kan chiah khawh hna lo hmanh ah sianginn le Church school cu an kai hrimhrim awk a si.

2. Nifatin sianginn an kai lawng si loin, an chuah hnu ah khin an tuah khawh tawkte kan ṭuanter lengmang hna awk a si.

‘A thiam lai lo, a hrawh sual lai’ ti lengmang ding a si lo.

An thiam chun tete tal ṭuanter ve lengmang hna. Ṭuan ding kan chimhmi hna an ṭuan ruang i an hrawh sual tikah sik ding an si lo. An tuah lengmang ahcun an thiam hrim te ko lai. Amahbalte, an hrawh sual tikah a poi dingmi tu cu tuahter lo ah a ṭha.

Cristiano Ronaldo nih zarhkhat ah nuai 5 hlawh kho ding tiangin football a thiamnak a ruang cu a thiam lo buin ai zuam lengmang ruangah a si.

3. An thiam chung tete; ṭuang hnawh, thlalang hnawh, innchung le innleng phiah tibantuk kan tuarter hna awk a si. Cun, thilpuan a ṭha lem lomi zong kan sukter tawn hna awk a si fawn.

Kan duhning in an thianter khawh lo zongah a poi lo. A ngandammi ngakchia nih cun cawlcangh hi um sawhsawh nakin an i nuam deuh tawn.

4. An i celh awk thil zong cawkpiak in celhter lengmang ding an si. An ngandamnak a si pinah um sawhsawh nak cun a ṭha deuhmi a si fawn.

Hitihin kan fale cu an tuah khawh tawk rian kan ṭuanter lengmang hna ahcun thil ṭhalo tuahnak an ngei lai lo i, nulepa caah ningzahtertu le ngaihchiattertu an si hrim lai lo.