Hazard: “Tu Season Dongh Ah Biakhiahnak Ka Ser Cang Lai”

Eden Hazard nih tu season dongh tikah khin biakhiahnak a ser ding kong a chim i, Chelsea a chuahtak ding le chuahtak lo ding kong cu tu season chungah hin a fiang rih lo tinak a si.

Belgian star Eden Hazard hi Real Madrid ah a lut lai timi thawng a thang ngaingai i, World Cup a dihka lebang ah khan cun hi kong hi a sport media kip ah hmuh a rak si. Chelsea caah tu season zongah hin san a tlai hringhran hoi i, Blues caah kum 2020 tiang contract a rak tial cang caah hi ruangah hin rianrang cun chuah dawhdang a si lo. Amah Hazard hrimhrim nih hin Real Madrid caah chuih cu a saduhthah bikmi a si ve.

Real Madrid lei zong nih caanrem a um paoh ahcun Hazard cawk hi an i hne lai lo ti a si ve. Hibantuk thawngpang a um ruangah hin thenkhat nih cun January thla ah khin Hazard nih Stamford Bridge a chuahtak men ko lai tiah an zumh.

Hazard nih, “Atu ah hin cun Chelsea lawnglawng ruahmi ka ngei i, tu season a donghnak dingah thla 7, thla 8 hrawng a um rih. Cu hnuah cun thawngpang a phundang maw phundang lo ti cu hngak rih ko hna usih” a ti.

“Coach he hin kan lungthin put ning ai lo ngaingai i, player hna nih football kan ruah ning bantukte in a ruah ve i, kan lung ai rual ngai. Napoli chuih ning zoh ulaw, an thiamning nan hmuh ko lai, khakha Sarri thawngin a si. Cu bantukin Chelsea zongah hin kha bantuk puai zohdawh ngaimi kha a hun i luhpi i, amah duhning tein a chuih khotu player a ngei fawn. Atu ah hin cun kan i nuam i, football hi tha tein kan chuih kho ko” a ti fawn.

Kum 27 a simi Hazard nih hin atu ah hmailei a konglam chimphuan hau ah a ruat rih lo i, Chelsea caah biatak tein chuih kha abiapi bikmi a si rih kong a chim. Season dongh tikah khin cun khuaruahnak thar he thil a cuanh ding kong a chim fawn.