Higuain: “Ronaldo Ruangah Juventus Nih An Ka Ṭhawl”

Gonzalo Higuain nih Cristiano Ronaldo cawk an duh ruangah Juventus nih hramhram in an chuahternak kong a chim.

Argentine hmaikal Gonzalo Higuain nih hin Juventus nih July thlaah khan Ronaldo cawk an duh ruangah an club in an chuahternak a si tiah a chim. Atu ah hin loan in Italian club dang AC Milan ah a chuih cuahmah lio a si.

2016 ah khan Higuain hi Juventus nih Napoli sinah €90 million in an rak cawk. Juventus cu season hnih chungah Serie A ah kawl 40 a khumhpiak hna. Juventus nih ruahchannak nganpi he an cawk hnuah an i ruahchanmi UEFA Champions League title a lakpi khawh hna lo ruangah Higuain cungah ruahchannak an ngei ngam ti lo.

Juventus nih hin Champions League title lakpi khotu dingah an zumhmi Ronaldo an cawk i, an i ruahchanmi ram phakpi dingin an zumhmi a si caah Higuain an chuahternak hi a si tiah ruah khawh a si.

Higuain nih hin Juventus chuahtak a duh rih lonak kong a chim i, August thlaah khan AC Milan ah ai ṭhial i, seaon dongh tikah khin AC Milan le Higuain hnatlaknak an ngeih ahcun an cawk khawh thai te lai.

“Juventus chuahtak hi kai tim hrimhrim lo, club nih an ka zohkhenh ning a ṭhat pinah ka team-mate hna le fans pawl zong nih an ka tlaihchan ngai ko tiah ka ruah. Chuak dingin ka hal hrimhrim hna lo, asinain an ka ṭhawl diam ko” a ti.

A chim rihmi cu, “Boruak ṭha lem lomi a hung um ti ka hngalh i, a hnuah Ronaldo an cawk i kei cu sirah an ka hnawl thai. Milan kha a hramthok tein ka tlaihchan colh i, Juventus nih an ka duh taktak lo tikah fawizaang tein biakhiahnak ka ser colh ve. Juventus chuahtak kha cu keimah duhthim khawhnak a si hrimhrim lo” a ti.

Juventus caah Serie A title 2 le Coppa Italia title 2 a lakpitu Higuain nih, “Juventus caah biatak tein ka rak i zuam ve tawn i, title zong tam ngai ka lakpi manh hna. Cristiano an cawk hnuah dirhmun sang chinchin ah um an duhnak kong an chim i, ka caah hmunhma a um ti lonak kong an chim fawn” tiah a chim.