Iran Nuclear Ngiatthlai ( Spy) Nakah Nitlak Leiram Le Israel Nih Laiking An Hman

Iran nuclear hriamnam kong hi ramkip nih theih an duh cio mi a rak si, a sinain an theih khawhnak ding a lam har ngaingai. Cucaah a lamkip in an rak ngiatthlai cio.  Cacawn nihnih ni ah Iran ralbawi hlun chief-of-staff nih a chimmi cu nitlak lei ram pawl nih Iran nuclear hriamnam kong theihkhawhnak ding caah a thli tein Laiking or Laikeng hmangin an ngiattlai tawn tiah a chim.

Saram hmangin Iran nuclear a ngia thlai tu ahhin Nitlak lei ram lawng siloin Israel zong an i tel tiah a chimchap. Nitlak lei ram pawl nih Iran nuclear hriamnam ngiattlai nakah an hmanmi hna hi tourist, scientist pawl le pawngkam ummi humhak tu minung pawl hi an hman hna tiah Iran ralbwi Hassan Firuzabadi nih a chim.

Kum tam ngai a liam cangmi ahkhan khual tlawngin micheu khat cu Iran ramah an rak phan, Palestine pawl caah bawmh an rak hal, an umtu ning kan zoh hna tikah kan lunghrinh hna i an thilri kan check. An thilri chungah Laiking  le a zawng ai thleng khomi Laiking lian phun conghrang ( chameleon) kan hmuh hna. An vun kan zoh hna i thil fa tete an benh hna, kan chek i kan hmuh khawh mi cu nuclear hriamnam ngiattlai nakah an hmanmi an rak si tiah Firuzabadi nih a chim. Nitlak lei ram pawl cu an hlawh a tling bal lo tiah a chimchap.

Saram phun in ramdang mi a sungtthoh tawntu hi Israel deuh an si tawn. January 2016 ahkhan Lebanon nih mupi lianpi an rak tlaih, cu mupi ahcun Israel sermi thil pakhat an hmuh, asinain cu mupi cu Israel nih mi ngiattlai ( spy) nakah an hmanmi siloin scientific research tuahnak ca tu ah an rak hmanmi a si an theih i an thlah tthan.

Hamas tapung nih Dolphin nga an rak tlaih hoi, cu dolphin nga cu Israel nih mi ngiat tlainak caah an hmanmi a rak si. A luancia kum hnih hrawngah khan Turkey nih va an rak tlaih hoi, cu va cu Israel nih mi ramdang ngiattlainak ah a hman mi a rak si hoi. Kum 2012 lio ahkhan Sudan ah Mupi an rak tlaih hoi i cu mupi cu Israel sungtthoh Mossad spy nih mi ngiattlai nakah an hmanmi asi tiah an rak phuan hoi. Laiking in  Iran nuclear hriamnam a ngiatlai tu zong hi Nitlak lei ram lawng siloin Israel ram zong an si ve tiah Firuzabadi nih a chim.

Ref: The Times Of Israel

error: Fir tim hlah, Share lawng ngah !!