Iraq Tapung : Israel Le Hezbollah Raltho Hna Sehlaw Hezbollah Leiah Kan Ttang Lai

Iraq ah hmun a khuarmi  Iraqi militia Harakat al-Nujaba tapung pawl i a lubik pa nih a chimmi cu Israel le Hezbollah hi raltho hna sehlaw kan nih cu Hezbollah tapung leiah kan ttang lai i Israel kan doh ve ko hna lai tiah a chim.

Iraqi militia Harakat al-Nujaba tapung le Hezbollah tapung pawl hi kum 2013 lio zongah khan Syria cozah ralkap he ttang tti in IS ralhrang a doh tti mi an si.  Cacawn nikhat ni ahkhan  Iraqi militia Harakat al-Nujaba  tapung hna i an secretary general Akram al-Kaabi cu Hezbollah tapung pawl a va leng hna. Hezbollah ralkap bawi thlan zong a va zoh.

Hezbollah ralkap pawl a tlawn hna lio ah a chimmi cu Iraq ah hmun a khuarmi Harakat al-Nujaba tapung pawl nih Hezbollah kan i dirpi peng hna lai. Israel he raltho sual ulaw nan mah he Israel cu kan doh tti lai tiah Kaabi nih Hezbollah pawl cu a chimh tiah The Times OF Israel nih a langhter.  Harakat al-Nujaba tapung pawl Iraq ramchung um tapung ahcun a thazaang tthawn taktak mi an si.

Harakat al-Nujaba le Hezbollah tapung pawl hi Iran nih a bawmh mihna an si veve. Hi tapung group pahnih le Syria cozah ralkap hi hawittha ngaingai an si hna i ralhrang zong a doh tti lengmang mi an si. Israel le Syria zong raltho sual hna sehlaw Syria leiah hi tapung bu pahnih hi a ttang dingmi an si fawn. Israel cu doh tu a ngei ngaingai ko nain zeihmenh ah a rel ve hna loh.

Rf: The Times Of Israel