Kan Semnak A Chiatnak Aruang Pakhatnak & Pahnihnak: Salai B. Chan Khar

Kan Semnak Ram A Chiatnak Ruang I

Aruang tampi ka tial hlan ah Myanmar ram pumpi ah sifak le santlailo le mirum le milian kar ah a fak tukmi thleidannak hmanthlak ka tial hmasa.

Mirum le milian nih a lal in an kan lalhnawh. Leidip lak ah sifak an kan rialchih. Santlailo an kan namneh. Pumtlinglo minung an thlanglamh hna. An puarthaunak kong hmanh kan chim ngam lo. Sia ruah tuar in kan tuar peng.

Tahchunnak ah, sii-inn ah siibawi le nurses daithlan ruangah a thi lo ding kan thi. Siibawi le nurses cungah kan ngaihchiatnak hmurkaa hmanh kan duhning in kan ang ngam lo. Ningcang lo in thih kan tong nain ningcang lo in a dih. Santlailo thih le zatlak cu zei phu a tho lo.

Awteh, siibawi le nurses cu, milian le mirum lakah an i tel cuta. Kannih sifak bia cu, zei ah relpiak a tlawm teh. Vawlei hi a fair lo tuk. Sifak le santlailo dirkamhtu cozah ttha kan ngei fam lo cu ta. Sia ruah tuar in teh kan tuar peng ko rih lai.

Cozah zung ah rian kan sok. Thiamnak ttha tuk na ngeih zongah hmuh lai i ruah duh hlah. Thiam le thiam lo nakin aa pehtlaimi officer pawl he aa theihngal deuh le tangka tom in a chep kho deuh paoh nih rian an hmuh deuh ko hih. Midingfel an hrum an ai. Sifak le santlailo lung a fak. Ziah hihi a can? Aruang ka tial te lai.

Laimi kan biaknak zong ah thleidannak a chah, kan Bawipa Jesuh nih Jerusalem i thleidannak puanzarpi a thlek cang ko nain. Khuate siseh, khuapi ah siseh, thleidan tlang a sang. Thleidannak thlaici a keuhnak ram le theipar a chuah cangnak ram in kan tthanglian fam cu ta.

Laitlang i khua pakhat ah mirum milian deuh le mitthawngttha pawl nih khuapi khapmi thil an pah. Ahodah a cawl ngam. I phetchem nun in a dong; mirum le milian pawl nih an duh thil an co. Cucu khua tthalo, khua nuamlo kan ti. Cu bantuk phun cun, ram thalo zong hi a si ve.

Kawl ralkap le central cozah nih nihin tiang an kan thleidan peng caah a herh bikmi thil – mah le ramkulhte ah nawlngeihnak (residual power) – an kan pe duh lo. Residual power a um lo cang ahcun, rampi cozah he i ttawmmi nawlngeihnak (concurrent powers) a um kho lo. Residual powers le concurrent power in i uknak hi Federalism an ti. Thleidan kan si peng ruangah a cunglei i thleidannak tlangsang khi pumpak nun, sii-inn nun, zatlang nun, cozah nun le nun zeizong ah a um peng ve. Myanmar ram le na ramkulh ah thleidan dohnak phungbia (Anti-Discrimination Acts) an um lo teh. Cozah lila nih cun pei a tial in tial lomi thleidannak phung in kum tam tuk chung an kan uk cang fam le kan thi le kan sa tiang in kan i nunpi viar cang hi.

Kan ram a chiatnak aruang cu, Federalism uknak kan ngeih bal lo caah a si. Cucaah cun pei, mirum le milian le mitthawngttha nih duh paoh in sifak le santlailo a zawitu zapi an kan namneh pengnak hi a si cu. Kan lungfahnak le kan ngaihchiatnak hmanh kan chim ngam ttung lo. A in te in kan i in peng. Kawl kan ttih peng hna hi.

A tanglei biatlangtar pawl hi ka hun tial te hna lai i, kan ram a chiatnak aruang nan hun i fiang chin te lai.

  1. Phunghrampi Nawlngeihnak (Constitution)
  2. Ramkulh Cozah Nawlngeihnak (Residual Powers)
  3. Rampi Cozah Nawlngeihnak (Ralkap An Si Lo)
  4. Ramkulh le Rampi Cozah Hrawmmi Nawlngeihnak (Concurrent Powers)
  5. Cozah Tuan Liomi Nawlngeihnak (Executive Powers)
  6. Phungbia Nawlngeihnak (Judiciary Powers)

* Ngunkhuai Phungbia, Thleidan Dohnak Phungbia, Professional Phungbia, Public Administration Law tbk. a herhning in ka run tenhchih hna lai.

Kan Semnak Ram A Chiatnak Ruang Cu II

Phunghrampi 2008 a si. Tlangmi ramkulh nawlngeihnak pakhat hmanh a um lo. Rumro nawlngeihnak (totalitarianism) lam in rampi President nih calkingh phun in ramkulh Chief Minister pi a thim.

Federal State kan pe hna sehlaw kanmahte in ramkulh Phunghrampi kan i ser lai. Ramkulh Phunghrampi tang ah Crimes Act, Wrongs Act, Public Administration Act, Education Law, Health Law, Land Act, State Police Act le a dang phunglam tampi kan i ser hna lai i, kan ramkulh cu a khel ai let vuaimai ko lai.

Ramkulh khuasa mizapi nih kan parliament hruaitu pawl le Chief Minister kan i thim hna lai i, a fel lomi MP le Minister paoh, voi nolh thimnak ah ka tthilh mei hna lai. Cucaah, fel lo an ttih lai i, ramkulh um mizapi aw-aan an ngai hnga le mizapi kha nawlngei bik lengmang kan si hnga.

Ralkap suaimi phunghrampi 2008 tham ah cun, Myanmar President le State Counselor tluanhtlamh peng an hau le Chief Minister le Parliament Speaker nih anmah hnarkua in an thaw an chuah kho lo. State Parliament nih phungpi ‘Act’ ngaingai sernak nawl an ngei hme maw? Nawl an ngeih cem ah zulhphung ‘Regulations’ hrawnghrang lawng dah an ser lo ah. Ka hngal ve loh.

A cunglei pi i ka langhtermi State Phunghrampi le State Acts pawl khi Federal ram hruainak phung ah cun, kan i ser hna hnga le biaceih zung zong, State Lower Court, State Intermediate Court le State Supreme Court/ High Court tehna kha kanmah tlangmi (Laimi) bak nih kan sak hna lai i, biaceih bawi kan ttuan lai. Supreme Court Judge Mang Lung Kio ti phun hna kan hun ngeih hna lai.

++ Ka peh than te lai ++