Kan Semnak Ram A Chiatnak Ruang Cu III

Kan Semnak Ram A Chiatnak Ruang Cu III

___________________________________________________

Kan kokek covo a simi mahte lairelnak an kan chuh le an kan khirh duh lo ruangah a si.

Kanmah ramkulh “State” ah State Phunghrampi ser an kan sianh lo. Chin miphun hi Chin State Phunghrampi ser an kan sianh lo caah Crimes Act tehna, Civil Act tehna, Health Law tehna, Education Law tehna, Ngunkhuai Law le a dang Act le laws vialte kan i ser kho loh.

Myanmar Phunghrampi 2008 tang ah rumro in an kan uk peng. Kawl Act le Law in kan duh ah, duh lo ah kan cungah lai an rel.

A ngaingai tiah cun, Myanmar ram um miphun dihlak hnatlaknak in ser dingmi Myanmar Federal Phunghrampi lawng a dingmi a si lai. Phunghram 2008 cu, Federal Phunghrampi caah remh awk tlak phun zong a si lai lo i, Federal Phunghrampi cu, a thar bak in tial awk a si.

Myanmar Federal Phunghrampi suai ah cun, tlangcung miphun vialte le Kawl miphun vialte ai-awhtu kan mifim nih an suai lai. Cucu a fairmi Federal Phunghrampi a si lai i, mah le ramkulh cio ah a cunglei i ka langhtermi State Phunghrampi le Acts le Laws vialte sernak nawl, kan kokek covo kha a kan pek lai.

Kanmah le State cio ah kanmahte in kan i sermi phunghrampi le phungpi, phungbia le phunglam in lai kan rel lai. State i biaceih inn ah state phunghrampi le phungpi, phungbia le phunglam in bia kan i ceih lai.

State palik kan ngei lai, Chin State Police ti bantuk in. Hihi State cozah nawlngeihnak tangah a si lai.

State nih kanmahte in education law kan i ser lai i, sianginn le sianghleirun cacawnning phung in hma kan la lai. Kan education level a sang thluahmah lai le international level lei ah a kal thliahmah kho lai. Federal Cozah nih cacawnnak fund a kan tum lai, a kan pek lai.

State nih kanmahte in Health Law kan i ser lai i, sii-inn le ngandamnak kong kan i tawlrel lai. Federal Cozah nih fund a kan tum lai. Siibawi le nurses ai uahmi le professional standard ziaza a phan lomi pawl kha State mizapi ai-awhtu Chin ramkulh cozah nih nun a chimh hna lai. Ahodah aa uah ngam ti lai, ahodah a daithlang ngam ti hnga.

State nih kanmahte in Ngunkhuai Law a phunphun kan i ser lai i, Chin State chungah riantuan nihlawh le chawleh miakmai a hmumi vialte le ngunkhuai pek awk a simi paoh nih felte in an pek lai. Cu ngunkhua lila cu, Chin State cozah nih Chin State khuasa mizapi caah a hman lai.

Mizaw, mibei, santlai lo deuh, tarnu tarpa, nuhmei le ngakttah, hngakchia kha Chin cozahpi nih ahlei in, a zohkhenh khawh cang hna lai. Chin State chungah khuasa minung kha ahohmanh rawl ttam in a thihter ti hna lai lo, thlop khawh dingmi zawtnak in an thi ti lai lo. Kan Chin State a hei nuamh lai ning.

Chin State Phunghrampi le Phung tang ah mi pakhat le pakhat kan i hmaizah lai. Hmaizah duh lo in midang covo a buarmi paoh kha Chin State Civil Act le Law in dantat a si lai i, pakhat le pakhat kha ningcang lo in i ti ngam a si ti lai loh. Misual pawl kha State Crimes Act le phung in Chin State Courts nih an bia a ceih hna lai i, thong le liampal tiangin dan a tat hna lai.

Atu tham ah cun, cunglei in a zeizong ah Kawl cozah le ralkap nih an kan uk caah anmah tining lawnglawng in kan kal. Cucaah kan ram a chia peng.

+++ Ka peh than lai +++

By Salai B Chan Khar