Kum 6 Ngakchia Nu Nih A Thimi A Pa Hmantlaak FB Ah A Tholh i An Khamh!

USA, Michigan  – Kum-6-upa ngakchia nute cu Michigan an inn in a thi cangmi a pa le zei hngal lo in a tlumi a nu-ei hmanthlaak facebook ah a tholh i palik pawl an va kal tikah harnak lianngan he ngakchia cu a rak um ko kha an va hmuh. A pa cu a rak thi cang i, a nu-ei zong mah hngal lo in a rak ril.

Ui nih kum 40 upa a pa hmai cu a rak ttam tiah palik nih an chim. Mount Morris Township Palik Bawi Terence Green nih, “Ngakchiate a cawlcanghnak nih nunnak a khamh. Hi ngakchia hi a thluak a ttha i, tthathnemnak a ngei,” a ti.

Cawnninga chunhnu ah hringtu a nu tak sinah a um cang. A nu-ei, kum 36, cu sizung a phaan. Asinain, zei thil set dah a cang timi kha palik pawl a chim kho rih hna lo. Palik bawi Green chimning ahcun ritsi hleiluat in an din ruang si dawh a si. Rithaisi an tawnghthammi cu zei bantuk phun dah a si i, khaw zei in dah a rat theih a si rih lo.

Mobile phone in ngakchia nute nih facebook ah a tholhmi cu a pilepu nih an hmuh tikah palik an chawnh i, an inn ah an va kal. Inn chung an va luh tikah ngakchia nute cu a rak ttap. A pa cu a rak thi cang i, a nu-ei cu mah hngal lo in ttuang laiah suimilaam 24 chung a rak ril cang. Ngakchia cu ni khat chung zei hmanh ei lo in a rak um, cu nak zong in a rawl ei lo hi a sau kho men.

Ngakchia nute nih cun zing ah ka tho i, ka nulepa  cu ka va tthangh hna, an ka leh lo tikah an hmaiah tii in ka theh fawn hna nain an i tthang hlei lo a ti.

USA TODAY