Kum Thar Zing Mileng le Sonhtarh

Kannih Lai miphun cu kan pipu chan tein sonhtar a hmangmi miphun kan si hngalh dih a si. Kan Lai phungthluk kan ti hnga maw, “Ka fa thi kaw, sonh lo kai sonh” ti zong kan ngei. Hi bia nih a langhter mi cu sonhtarh an rak hmang hrimhrim tinak a si. Phun dangin kan chim ahcun a si lomi, ahman lomi kan i sonh.

Tahchunhnak ah, “Lohluai thlawh cu thihnak an ti caah cu lo thlopa cu a thi taktak i an sonhtarh.” June thla ah ai tthi-ummi an um i caan rau lo ah cu hna nuva ah pakhat a thi, cu tikah an i tthitumhnak thla “June” kha an i sonhtarh. Cubantuk tthiamtthiam in tuchan zumtu ai timi kan miphun zong sonhtarh, sarcuanh, ruah le dottlak kan hmang.

Khrihfa chang ah kan lut i Lai phung kha Khrihfa phung ah ai thleng kan ti ko nain kan pipu chan in a luangmi tihna a cat kho lo. Cucu sorhtarh le ruah kan hmanmi hi a si. Zeitindah kan khuasak le tthachin kan relning kan i ngiat tiah ahcun kum thar zing mileng a si.

Kum thar zing milengkai kha a min ah “Paam phur” a si ahcun kum thar kan chungkhar lamthluan cu zeitlukin kan thlawhttuan ko zongah kan pam lai, phur kan phiar lai, a min pei chiakha tuk cu tiah kan ti. Hi bantuk ruangah cheukhat cu kum thar zing milengkai an rem lo. Milengkai cu um rih seh, chawnbia hmasatu hmanh an i sonhtar ti si. Hihi Khrihfa nun he cu ai rem lo taktak mi a si.

A hlan ah siseh, atu chan zong ah kan i sonhtarhmi, hmuh chia le ton chia ah kan ruahmi hna cu: nupi hal lio voih voih-voih nih bia a al an ti i tlamtlin lonak a si. Khuaktlawn umkal tikah bong nih a awnh hnawh hna lo ahcun harnak ton ah an i ruah.

Cun a awnhhnawh hna hmanh “dak” ti lawng ah a awnh ahcun an khualtlawm lam ah maw, siloah innlei ah maw harnak pakhatkhat a cang an ti i umkal an i let. Cun bui vai hmuh le rulman hmuh cu thihnak an ti.

Kum khat ah innchungkhar a chuaklei le a lutlei (fanu pasal ngeih le fapa nupi tthit) ton cu a ttha lo. Nikhat ah chungkhar chungin nitlak le nichuah in umkal veve cu a ttha lo. Kan pipu nih si hna seh, tuchan minung nih si usih kan i sonhtarhmi tampi an um rih. Taktak tiah cun rak i sonhtarhmi hi an cang taktak dih lem lo, zeimaw vanchiat ah thihloh he an tonkhen biatu khi a si.

Cucaah Khrihfa nun ah sorhtarh hi cu ai remkhaang lo. Chim duh mi cu sonh lo le sonh lo kan hmanmi, kan milengkai min chiat le tthat kan i sonhtarh mi hna khi kan hman awk a si lo. An min nih khan lai a rel lo, kan chungkhar tu nih lai a rel.

A biapi mi cu milengkai min kha si loin kanmah nih Pathian thluachuah hmuh awkah zeidah kan tuah timi kha a si. Cucaah hi bantuk sarcuanh hi Khrihfa a simi miphun ruahnak le lungput ah um ti hlah seh.

Credit : Carson Tin Twin Oo