Malaysia Lai Mino Nih Concert An Tuah Mi Buainak Kongah CYOM Upa Kan Mawhchiat Hna

Malaysia, Kuala Lumpur khuapi ah CYOM hruainak in tuahmi concert nehhnu zul zoh tikah lung a rawk i ngaih a chia hringhran. Kan hlasak thiam hna thinlung zong fiang put in a hunglang, cu pinah CYOM upa hna thinlung ruahnak le Lai tlangval cheukhat thinlung le ruahnak zong fiangput in a hung lang ve.

Hlasa tu le mipi buainak  kongah CYOM upa pawl ka mawhchiat hna. Zeiruangah tiah cun CYOM upa nan khuakhanak hrim a rak hman loin ka hmu. Hlasak nan sawmmi hna khi an mah le sining tawk cio in min ngei lawngte an si. Nilen hla a sak paoh ah stage cungah pangpar pek nan phih riangmaang i midang nih hla an sak paoh sile stage cungah pangpar pek nan onh hna. Midang hlasak thiam pawl zeiah nan rel lo riangmang hna i Nilen lawng minung ah nan ruah.  Kha bantuk khuakhannak le ruahnak hrimhrim nih mipi thinlung ah buainak a chuahter cang.  Mah kha ti khua nan khannak ruangah buainak a chuahnak a si ti usihlaw kan palh lai lo dah.

An mah le sining tawk cio in min ngei lawngte an si bantukin hlasa tu hna cungah thlaidannak nan langhter awk hrimhrim a silo. Tluk ruang tein nan zohkhenh hna awk a si.  Stage cung pangpar pek nan sianh hna lo a si ahcun Nilen caan lawngah siloin midang hlasa hna caan zongah nan phih ding a si. Stage cung i thlaidannak lungthin nan ngeih mi nih a dang hlasa tuhna thinlung zongah fak piin bia a chim ttheo lai ti ka zumh. Nan sawmmi hna hlasa tu cheukhat zong an thinlung mitthli nan thlak ter khawh mi hna a si. Cu pinah mipi hrimhrim an lung nan fahter hna. Kha nak fakin buainak a chuah lo hmanh kha kan van a ttha.

Hi thil kan ton mi nih hmailei tu ah fim kan chim sehlaw khuakhan zia kan thiam khawhnak ding ca zongah sihram ko seh. CYOM hruaitu upa zong kan in mawhchiat hna tikah nan thinhung hlah uh! nan thiltuah mi a ttha tuk ko, ai dawh tuk ko. Minung cu a palh kho mi lawngte kan si caah nan palh caan zong cu um ve phung a si. Hi bantuk thil nan tonmi nih nan lung in donghter hna hlah seh, Lai mipi caah fawh rian nan ttuan hih. Hmailei tu ah khuakhan zia kan thiam khawhnak hnga le fim a kan chimtu ah cang hram seh.