Man City Maw An Thiam Deuh PSG? An Champion Ning Cuanhnak

Nizan (April ni 15) ah European League ngan panga hna lakah champion thar team hnih an um ti kan theih.

Kan hnuzarh ah khan Bayern Munich nih Bundesliga title an rak cawi cang i, tuzarh ah Premier League le Ligue 1 champion kan hun theih ṭhan hna.

Image result for manchester city

Manchester City nih Wembley Stadium ah Tottenham Hotspurs 3-1 in an tei hna i, anmah a naih biktu Manchester United cu West Brom sinah 1-0 in an sungh ruangah Premier League ah Manchester City champion an si cang.

Hi thawng a than hnu suimilam pakhat tlukah Paris Saint-Germain nih anmah a naih biktu le champion lio a simi Monaco 7-1 bakin an phomh hna ruangah Ligue 1 champion an si ve fawn.

Image result for psg 2017/18 squad

League pahnih ah hin puai 5 veve chuih awk a tang rih. Teinak an hmuhning a ropui veve. Tutan ah hin zei team hi dah an league ah a ropui deuh tiah phun 4 in zoh hna usih.

1.Zeitiang in dah an champion?

Manchester City le PSG hi puai 33 an chuihmi chungin champion an si veve. Khuaruahhar ngai a simi cu City le PSG hi an chuih ciami puai 33 chungah teinak 28, draw 3 le sung puai 2 veve – an result ai khat bak!

Image result for manchester city

Title an lakning tu cu tlawmpalte in ai dang. Manchester City nih TV (United le West Brom puai) zoh pah in an champion kong an theih! French club tu nih champion lio a simi Monaco 7-1 in an tei hna hnuah French champion title an cawi ve.

Manchester City nih pahnihnak Manchester United cu point 16 in an lonh hna i, PSG nih pahnihnak a si vemi Monaco cu point 17 in an lonh ve hna.

2. Kawl khumh

Image result for neymar mbappe and cavani

PSG le City nih hin an league ah kawl an khumh tam bik veve fawn.

Pep Guardiola naule nih hin Premier League ah kawl 93 an khumh i, puai kip ah kawl 2.81 a khumh tluk lengmang an si. 7-1 in teinak a hmukami PSG tu nih cun Ligue 1 ah kawl 102 an khumh i, puai kip ah kawl 3.21 a khumh tluk lengmang an si.

PSG player Edinson Cavani cu Ligue 1 ah kawl khumh tam bik (kawl 25) a si i, Manchester City caah kawl khumh tam bik a simi Sergio Aguero (kawl 21) cu Premier League ah kawl khumh tam bik 3nk a si.

Image result for aguero

French team nih hin an team in kawl a khumh khomi player 16 an ngei i, Manchester City nih kawl a khumh khomi player 13 an ngeih ve.

City caah assist ngei tam bik Kevin De Bruyne nih assist 15 a ngei i, PSG caah assist ngei tam bik Neymar nih assist 13 a ngeih ve.

3. Hnukham

Sir Alex Ferguson nih, “Hmaikal ṭha nih puai teinak a hmuhpi tawn hna i, hnukham ṭha tu nih cun League ah a champion pi tawn hna” a rak ti tawnmi kha kan philh rih lai lo dah. City le PSG hi season thokka in kawl venhimnak leiah an ṭha ngaingai fawn.

Premier League ah Manchester City nih hin kawl 25 an chuah cang i, puai 33 an chuih cangmi chungah clean sheet voi 15 an ngei. Hi clean sheet hna hi Ederson kawl a bawh lio caanah an si hna. Amahbalte cu clean sheet kongah Ederson le Manchester City hna hi De Gea le Manchester United nih an lonh hna, United hi clean sheet voi 16 an ngei cang.

Image result for de gea

Ligue 1 ah PSG nih kawl 23 an chuah i, puai 33 an chuih cangmi chungin clean sheet voi 16 an ngei. Hi clean sheet hna hi Areola (voi 15) le Trapp (voi 1) kawl an bawmh lio caanah a si.

PSG hi tu season ah Manchester City nakin goal difference an ngei tam deuh fawn i, Manchester City nih +68 an ngeih lioah PSG nih hin +80 an ngei.

4. An dirhmun

Image result for de bruyne

Premier League ah al awk ṭhalo in Manchester City caah lam a harsa deuh tuk. Manchester United, Liverpool, Tottenham, Chelsea le Arsenal he an izuamcawh hna. PSG tu hi cu Monaco lawng an si kan ti khawh. A dang a zuamcawhtu tham cu Lyon, Marseille, Rennes le Nice tepawl sawhsawh an si. Cu ruangah Manchester City zulhmi lamthluan a harsa deuh ti a fiang.

Image result for cavani

Cu pinah City hi an zuamcawhmi hna sinah an ropui ngaingai i, Liverpool 4-3 le kan hnuzarh i Manchester United 3-2 in an sunghmi dah ti lo cu zei team hmanh nih an tei hna lo.