Mi Cheukhat Nih Fiangte In Hngalh Lomi ‘VANRAM’ Kong 4

Vanram cu hi ‘universe’ (Pathian sermi thil vialte-van le vawlei) ah hin a um lo:  ‘Universe’ timi cu kan umnak vawlei le a dang vawlei vialte le vankildeng ah a ummi arfi le Thlapa le Nika umnak vialte umnak le hmun hna hi an si. Mi tampi nih Pathian bawitthutdan hi a dang vawlei (planet) ah a um tiah an ruah tawn.

Asiloah Pathian vanmi pawl umnak cu hmun pakhatkhat ‘galaxy’ (arfibu pawl umnak) ah a si lai an ti. Asinain, Bible nih Pathian umnak cu  vawlei  dang  hmun a si a ti lo i, kan umnak vulei in khuaruahhar ai hlatnak vankildeng hrawnghrang  ah khin vanram cu a um a ti fawn lo.

Bible nih Pathian umnak cu chimpit in a hlatnak hmun, minung nih van le vawlei tiah kan hngalhmi pinlei ram a si. Lamkaltu 2:33 ah Jesuh thih hnu thawh tthan van kainak le Pa orhlei ah a tthutnak kong kan hmuh. Eph. 4:10 ah ‘van vialte nakin a (Jesuh) sannak hmun ah a kai’ ti a si. Sam 113:4 zong ah ‘a (Jesuh) sunparnak cu van nakin a sang’ ti a si.

Pathian umnak cu  ‘universe’ pinleipi/leengah a si ti a fiannak pakhat cu, Sertu a si caah a umnak hmun in hi van le vawlei vialte hi a ser i, a umnak cu sermi ah a si lo ti a fiang. “Ceunak um seh” a ti i, van le vawlei ceunak vialte hi vuk a hung um. Science nih hi vialte hi ‘bigbang’ in a hung ummi a si an ti. Cucu a dik lo,  Pathian nih um seh a ti ruangah a hung ummi tu an si deuh.

Hi ‘universe’ tham cu zei he dah ai lawh ti ahcun minung nih bawm hmete kan ser bantuk hi a si. Kan caah cun hi ‘universe’ hi lianngan tuk hmanh seh Pathian caah cun bawm bantuk men a si. Bawm bantukin ka tahchunhmi Pathian kut chuak ‘universe’ ah hin ‘caan’ timi a hung um tthan. Caan zong hi sermi he ai tlaimi a si. Pathian tu cu ‘zungzal’ a si, zungzal nih hramthoknak a ngei lo, dihdonghnak zong a ngei lo.

Cu caah ‘vanram’ cu zungzal ah khin a um. Zungzal vanram in ‘um seh’ tiah a bia in a chim i, hi sermi vialte hi an hung um. Pathian nih a duh ahcun a sermi chungah hin a hung lut lai i, a chuak tthan ko lai. Caan leeng/pinlei ah khin vanram cu a um.

Vanram cu Jesuh Khrih ttum hlan taksa thih hnu thlarau umnak a si: Hika zawn ah hin elnak a chuak tawn. Mi cheukhat nih thih hnuah cun mah le mah i hngalhnak a tlau lai i, Jesuh ttum tik lawnglawng ah vanram ahcun na kal lai tiin an cawnpiak. Na rel-hngalhmi paoh na zumh a herh lem lo. Nain, thih tikah mah le mah i hngalhnak a um lai i, dengteo in na thlarau cu Pathian bawi tthutdan umnak ah a kal lai. Mah cu kei ka zumhmi a sinak aruang cu Paul nih 2Corin. 5:8 ah thih i a Bawipa sin um a duh deuhnak kong kha a chim.

Paul nih thih hnuah mah le mah i hngalhnak um hlah sehlaw  hi bantukin bia a chim lai lo. Harnak a ton lioah nuamte in Pathian sin um a ngaihnak le duhnak kong a chimnak a si. Thih hnuah mah le mah i hngalhnak a umnak aruang dang pakhat cu Biaphuan 6:9 ah martaar in a thimi thlarau hna nih an Bawipa cu vawlei ah va kal in an thisen caah teirulcham fial.  Na taksa/lei nun na hngalh tthan khawh viar la tinak a si.

A si ahcun zeiruangahdah Paul nih thawhtthannak a um hlan tiang a thimi zumtu hna cu an i hngilh a ti hnga, i hngilh cu mah le mah i hngalh a si maw? Bible mifim tampi nih an lehning ahcun hika zawn i ‘hngilh’ hi mah le mah i hngalh lo ti in an let lo. Jesuh a rat tikah a thimi zumtu takpum cu a tho tthan lai caah ai hngilh a tinak  a si tiah an fianter.

Asinain, a thimi zumtu thlarau van ah a ummi le thlaan ah phummi a taksa cu Jesuh a rat tikah an i peh tthan lai. A thar in kan taksa thawhter a si lai. Zumtu hna cu kan takpum zong hi zungzal in  a thi kho taktak lo. Thih chim hlah, a ttha deuhmi taksa in thlenpiak kan si lai. Jesuh  a rat tikah a thimi zumtu takpum cu thlaan chungin ai tthang lai i, a hung tho tthan lai caah ‘hngilh’ biafang a hmannak a si.

A pathumnak cu, Jesuh a rat tikah vawlei hi kum 1000 chung zumtu he Jesuh nih a uk lai: Bible nih Jesuh a rat tikah thlenmi taksa a kan peek lai i, vanram ah a kan hruai tthan la a ti lo. Taksa thar in a kan thawhter lai i, van chum cungah khin a kan ton lai timi cu a um ( 1Thess. 4:15). Cu hnuah kum 1,000 chung vawlei uk dingin kan hung ttum tthan lai. Olive Tlaang in vawlei cu remdaihnak he uk a si lai.

 A donghnak bik ah, a hung um dingmi vawlei thar cu zungzal na umnak ding a si: Mi cheukhat nih dik lo ngai in an ruah tawnmi cu zungzal kan hmannak ding hmun cu atu i Pathian bawitthutdan umnak khi a si lai an ti. Bible nih a chimning tu cu ai dang. Jesuh vawlei ah a rat tthan i, kum 1,000 a uk hnuah  hi kan umnak vawlei hi hrawh dih cikcek a si lai. Cu hnuah Pathian nih vawlei thar le van thar a ser lai i, cuka ahcun zungzal in kan um lai, ‘universe’ thar a kan serpiak lai.

Mah cucu a hramthok in a tinhmi a si. Kum 1,000 a dih bakin Satan chuah a si tthan lai nain Jesuh  nih zungzal hell ah a thlaak lai. Cu hnuah atu kan umnak van le vawlei “universe’ hi hrawh dih a si hnuah Pathian kut in vawlei thar le van thar, zungzal in zungzal tiang, kan umnak ding hmun a hung chuak lai.

Cu vawlei thar le van thar ahcun Pathian bawitthutdan kha a hung um ve lai, Pathian cu minung hna umnak ah zungzal in a um ve cang lai. Zeizong vialte a tlamtlin dihnak hmun a si lai.

Note: Zumhning i hrawmh hi a poi nak a  um lo, mi hrawktu le buaitertu a si taktak lonak aruang cu kan relmi paoh le hngalhmi paoh kan zuum ballo. Ca reltu Pathian nih thlua in chuah seh.