Mi Ral Ttha Missionary Pa, Khrihfa Rambo Ti Zongin An Kawh

Pathian a thei lomi hna sin le ralthawhnak hmunah Pathian thawngttha bia a phuang mi le mibawmh chanh in a kalmi Missionary tampi vawleicung ah an um. Asinain American Missionary , US special ralkap hlun a simi Dave Eubank timi Pathian rianttuan tupa nunning zoh tikah mi ralttha taktak a si timi hmuh khawh a si.

Missionary Dave Eubank cu Pathian a zumhnak ruang le midang  chanhchuah khawhnak hnga le an nunnak ding a si paoh ahcun ka nunnak zong sung ko ning timi lungput he Bawipa rian a ttuan caah Khrihfa Rambo ti zongin an kawh mi asi.

Kum 2017 lio i Dave Eubank nih thil a tuah mi ruangah vawleicung mipi lawmhnak in an khat. IS ralhrang an hran taktak nak Iraq khuapi Mosul ah IS ralhrang nih minung an thah thluahmah hna lio, chungkhar zong pakhat hmenh taang loin an thah hna. Mithi ruak cu vawlei ah a ponh bak in ai pong.

Missionary Dave Eubank le a hawilei nih chanhchuah dingmi , a nungmi hna an um ti hnga maw tiin a kawl len, a zoh hna tikah an nunnak a liam cang mi lawngte a si rua tiin a ruah. Cu lio teah a chungkhar  dang cu IS ralhrang nih an thah dih cang hna i a thi cangmi a nu ruak tang teah thi le hnai he ai ciah i lungrethei vansang in a ummi hngakchia nu  mit au te an hmuh khawh. IS ralhrang , Iraq ralkap le US ralkap cu an i kah cuahmah lio a si. Meithal kuan cu a ruah bangin a sur lio le si fawn.

Missionary Dave Eubank nih a nu ruak taang teah ai thup mi Hngakchia nu va chanh lo ding cu a ruat kho hrimhrim lo. Va chanh ahcun IS ralhrang nih thilak rak kah ding le si fawn. IS ralhrang a doh mi US ralkap le Iraq ralkap sinah bawmh a hal. Mi nute a umnak hmun cu an umnak he 150 yark tluk ai hlat.

Missionary Dave Eubank le a hawile nih Pathian sinah thla an cam, Bawipa, hliam a tuarmi kan chanh khawhnak hnga lam kan on piak ko tiah thinlung tak tein thla an cam. Zumhnak he meithal kuan lak ahcun hngakchia nu te va chanh dingin missionary Dave cu a kal. A thi cang mi a nu ruak taang teah lungrethei thinphaang taktak in a ummi hngakchia nu te missionary pa nih a va lak khawh.

Photo credit: Free Burma Rangers/Instagram

Cu ruangah Missionary Dave Eubank cu Khrihfa Rambo tiah an auh nak a si. A lak mi hngachia nu cu zaan ah a sinah a um ter. Nihin ni tiang a dam tiah CBN news nih a langhter. ” Mi nunnak ka chanh ruangah ka thih a si zongah ka chungkhar nih an ka theihthiam ko lai ka ti a rannak in ka tli, meithal kuan cu a vorh bakin ai vorh, a sinain Bawipa nih a ka um pi. Dam tein hngakchia nu ka lak khawh” tiah Dave Eubank nih a chim. Cu ni ahcun mithi ruak lakah minung 7 kan chanh chuah khawh hna tiah a chimchap.

Mssionary pa nih a chanhchuah mi Hngakchia nute

Missionary Dave Eubank le a nupi, cun a fale tiangin an dihlak in ral a thawhnak hmun Iraq ramah IS ralhrang an hran taktak lioah Missionary a ttuanmi an si.  Mi tampi , Kawlram mi telh in tipil nak  zong a pe cang mi hna a si. Khrihfa ttha taktak le Pathian a duh taktak mi mi ralttha Khrihfa Rambo a si.

Image credit: Free Burma Rangers
Keren nu tipil a pek lio

Ref: CBN news