Midang Zeirello Va Hmang Hlah

Tlangvalpa nih nungak pakhat a duh ngaingai i nikhat cu a ralthatnak vialte he cu nungaknu cu thinphang ngai khin a duhnak kong a hei chimh.

Cu nungaknu cu a ruahning bantuk a si nemmam lo i, nungaknu nih cun, “Hey… thate in ngai tuah, na thla khat tuanmi hlawh (tangka) hi nikhat ka hmanmi tlukceo lawng a si. Cu bantuk cu zeitindah kan duh khawh hnga? Na raltha ko aw! Nang he hin ai duh kho ding kan si hrimhrim lo. Kal law, nangmah dirhmun he ai khatmi va kawl ko” tiah bo nawn in a rak leh.

Sihmanhsehlaw, tlangvalpa nih cun a duh ngaingai ruangah lungthin dang a ngei kho lo nain ka caah ruahchan awk a um lo ti a hngalh fawn caah lungfak ngai in a tuar.

Ni le caan hna an hung liam ve lengmang i, kum 10 tluk a rauh hnu ah ruahlopi in dawr ah an i tong. Cu nu nih cun, “Hey… zeitindah na um thai? Na dam tawn maw? Nupi hna na ngei cang maw? Kei cu pasal pei ka ngeih cang cu. Zoh hmanh, kan chim lai! Ka pasal nih cun thla khat ah sing 6 renglo pei a hlawh cu, na khuaruah a har maw?. Cu pinah, a fim i a fel tuk fawn” tiah uangthlar ngai in a hun chimh len.

Cu bia a theih tikah tlangvalpa cu a lungfak ngaingai. Asinain, leh a hun timh liote ah khin a  pasal nih an sin a hung phan i, “Ehe, boss, hika hin zeidah na rak ti? Hihi ka nupi a si ko hih. Nan kut i tlai ta u, zaangfah tein. Anih hi kan company ngeitupa a si, atu ah hin a kuttang ah billion tam tuk man project kan tuan cuahmah lio a si. Kan nu, kan boss hi i hngalfiang lo men lai. A dawt tukmi nu nih a duh khawh lo ruangah atu tiang hin nupi ngei loin pei a um thai cu. Mah nu kha mi vanchia ngaingai a si! Rak duh sehlaw cu mu vawleicung nu vialte lakah nu vantha bik a hei si ko hnga” tiah a nupi cu a hei chimh.

A nupi cu a ningzah he ai ngaihchih he chim awk zeihmanh thei loin vawlei lawng ngang ko in a zoh.

Kan nunnak hi a tawi tuk i, ai her lengmang fawn. Na dirhmun ah khan na dir peng kho lo i cu bantukin, midang zong an dirhmun ah an dir peng kho fawn lo. Cu ruangah cun midang va nehsawh le zeirello va hmang hrimhrim hlah.