Miroling Pu Hrang Nawl Kong Tawi

Pu Hrang Nawl cu Rev. Van Lo le Pi Sui Fam nih Thantlang peng Sihhmuh khua ah 1934 August 7 ah an rak hrin. Chuahpi unau pa 9 lakah pahnihnak a si. Zaathang (Darkhuah) chung a si. A nu paw chung a um lio ah a aw-aan (dak thawng bantuk) a ngei i a nu zong a lau ngaingai. Thla tlinglo (thla 7) in a chuak nain a ule le a ṭhirual nakin a lom i mipum ruaṭha le midawh a rak si. A ngakchiat lio in mi phundang hrim a rak si. Lenvah le hawi sin chuah a rak hmang lo. Mi biachim ngaih a zuam ngaimi a si lengah a biahal a pang ngai. Chunhthah le puai caan hmanhah rawl a hrawng zuam bal lo.

1946 June in T. Farrawn sianginn ah Mirang ca taangli (Laica taangli awng lawng nih an cawnmi) a cawng. Kanaan (Maths) a thiam ruangah Laica taanghnih awng lawng asinain Mirang ca taangli a cawn khawhnak a si. Cataang taanghnih khan a cawng mi asinain mifim le thluakṭha a si caah  a thiam bikin a awng. 1950-51 kum ah tanghra cawng ding asinain Farrawn sianginn sayate chambau ruangah saya rian an rak ṭuanter. Pu Hrang Nawl cu ṭha tein thil a theih cangmi le a rel cangmi hi a philh ti lo. Cucaah a cataang hawi le zong tha loin ca a chimh khawh hna. 1952 ah tanghra a cawng ṭhan i phi loin rian a lut.

1953 kum ah Hakha Siizung ah cazi a ṭuan. Cu lio ah Hriphi Middle Sianginn ah JAT a sok i a hmuh. 1953-55 tiang a ṭuan. Siang saya a ṭuan lio ah Hriphi khua ah Christian Endeavour (CE) a dirh i  khua ṭhanchonak rian an rak ṭuan. Ramkhelrian ah a lung a rak taan cang pinah a carelmi le amah zumhraihnak ruangah a kum rup loin thil a thei, khua a rak ruat kho ngai. Ramkhelrian ah i telnak in ram le miphun caah rian ka ṭuan khawh bik lai tiah a ruah ruangah taanghra awn le college kai ruat ti loin ramkhelrian ah aa mer.

Kawlram pumpi a voi hnihnak MP (Member of Parliament) thimnak 1956 April, amah kum 21 a si ah MP aa cuh/zuam i a tling. Kawlram chungah kum no bik MP a hmu khomi a si. Kum note Hrang Nawl nih MP a tlin tikah a thawng li bang aa hnin i mi nih an rak theih dih ti awk a si. 1958 ah amah a ṭihtu neekngei pawl nih rap an chiah i a MP sinak in phuah a tong. 1957 kum ah Chin National Organization (CNO) party cu Capt. Mang Tung Nung le Pu Vum Tu Maung he Tedim khua ah an rak dirh.1960 August ah Parliament (MP phuahmi hmun lawng a ummi hrangah) aa cuh ṭhan i a tling. Hi caan lio Kawlram party nganngan (Pha-sa-pa-lah  Tie-me/Tanh-sin) a rak thei khotu a si caah mizei ko dah a si hnga tiah Kawlram pumpi MP dang pawl zong nih hmuh lai an rak i ngaih dih. Pu Hrang Nawl (CNO party) nih Pha-sa-pa-lah party in Pu Ṭhio Ling cu amah khuaram ah faak tukin a tei. Parliament zung i biakamnak a va tuah lioah, “Khih! amah khi dahkaw mekuang eng (pha-sa-pa-lah tie-me i an mekuang rong) a teitu cu a si khih,” tiah an rak i zoh seek len.

MP a ṭuan lioah Tlaangcungmi tualto Party MP hna nih Federal phungin i uk caan a nai cang caah cu phunglam he aa tlaakmi upadi le phunghram zong an rak suaiter i tlaamtling tein an lim. Miral`ha a si bang U Nu sin ah a kal i, “Vuancichoh pa, Shan, Kachin le Chin hi Kawl miphun he nan kan namchuk i nan kan thleidan hlei ding a si lo,” tiah a va chim. Vuancichoh U Nu zong cu chikkhat cu a thin a hung nain an bia an peh ṭhan. 1961 kum ah Buddhist biaknak cu ram pumpi biaknak ah kan tuah lai tiah ceih a rak si lio ah alnak le duhlonak bia a rak chim. “Ram biaknak ah kan tuah ahcun an budget hi cozah nih suaipiak a si lai i a hruaitu hna zong thimpiak dih a hau lai,” tiah minit 20 chung a rak chim. MP a ṭuan lio ah kidnap (tlaih i tangka, thilri, minung lila pakhat khat in tlanhter khi) an rak timh. Rawlhrawn an sawm i rawldawr lei panh loin khualeng (Mandalay ah) Jeep in minung pathum nih an kalpi. Thil sining a hngalh tikah pistol a chuah lai bantuk khin aa umter i anmah lehlam cu Sah Tunglung (BSI) a hawipa sin a phakpi hna i a tei diam hna.

CNO party in MP hmunthum (Tedim in hmunhnih) an tlin tikah Chin Affairs Council hi kan mersan lai i CNO nih Minister zong kan tlaih lai an ti lio, Federal State (mah tein mah ram/miphun caah khuakhaan lairel khawh) in kan um cang lai tiah an i timhtuah lio, Kawlram MP dihlak aiawh in England Parliament ah bia chim dingah an thim lio le ram ṭhanchonak caah khuazaa an ruah lio 1962 March 2 ah General Ne Win nih uknak le nawlngeihnak a laak dih tikah an chunmang  vialte a lo dih i  rammi zong an ar dih ko. Hi cozah nih zeidah a chuah te lai ti lawng ruat in an cuanh ko lioah Paul kong le biaknak (Theology) cauk tampi a rel hna. 1962 ah ‘Ka Zahpi Lo’ cauk a tial. CACC nih cu  cauk cu Khrifa kum 100 tlin puai ah Laimi nih laiholh in tialmi cauk lakah a ṭha bik pakhatnak laksawng an pek. Cu cauk chungah Pu Hrang Nawl Laica le Laiholh a thiamnak le amah le a caang/kong chuak ah bia char le bia hman a thiamzia rel cim loin hmuh khawh a si. 1963 June 22 ah Rev. Sang Ling (Hakha peng Pastor hmasa bik) fanu Sayama Sui Thluai Ling a ṭhit. 1964 January 6 ah Bawi Cin an hrin.

Bawi Cin te chungkhar nuam tein khua an sak lio ah khatte lei ah Bawi Cin pa nih a ṭanh pengmi Democracy lam a cah ruangah lungnuam lo ngai in a um. ‘Zei thil dah a chuahpi lai’ tiah an cuanhmi Ne Win cozah nih 1964-65 ah zapi thil chuhnak le tangka thahnak a tuah tikah Pu Hrang Nawl cu a `hutsia a rem kho ti lo. A duh bikmi Democracy lam cu a huat bikmi Communist lam a zawh cang ti kha a hngalh i “Ne Win cozah hi a thawkkaa tein kan doh lo ahcun a hram a feh hnu ahcun mipi nih kan celh te lai lo” a ti. 1964 April 18 ah Culcutta um American palai a va ton hna. Hakha ah a hung tlung ṭhan i tlaih ding a si cang caah 1964 June in a dawtmi a chungkhar, miphun le ram kaltak in cozah ṭhalo doh dingin Indiaram ah Tapung(cozah doh) a tho.

Indiaram ah Pu Son Cin Lian, Pu Son Khaw Pau le Pu Tun Khaw Pum hna he ‘United Chin Government’ an dirh i an lakah Mirang holh thiam bik Hrang Nawl cu Foreign Minister rian an ṭuanter. Pu Hrang Nawl nih Pakistan i training (thiamcawn) a  va kaimi a ralkap pawl tluang tein an rak kir khawhnak dingah chaklei Laitlaang buaiter a herh ti a hngalh. 1965 February 17 ah Rih Police Camp a laak i meithal zun 16 an laak. March 5 ah Hakha an vun tuk ṭhan. Holhduh hmursau pawl ruangah an sung i zaan hlaanin an zaam.

Hi lio caan hi India le Kawl hna hi Neutral (Nichuahlei Communist zong tanh lo Nitlaklei bu zong `anh loin (MAH UM I UM) an um veve caah an i kom. Ne Win nih amah a dotu le India cozah zong nih an lungrinhmi (Mizo tapung le Naga tapung he an i peh tlai tiin) Pu Hrang Nawl cu tlaih dingin a nawl hna. Cu thawng cu Pu Hrang Nawl nih a theih tikah a zaam. A vanchiat ah motor khawndennak a tong i Shillong siizung a um lio 1965 October ah India cozah nih an tlaih. Mandalay thong ah thlahra an thlaak hnu ah Kawlram ah an kuat. Kawlram ah biaceih loin kumriat le thla sarih thong an thlaak hnu 1974 January 6 (a fanu Bawi Cin chuah ni) ah biaceih awkin Hakha an phaakpi. January 9 bia an ceih ni ah kum 8 thong degree an peek. A tlaak ciami kum 8 le thla 3 a si cang caah biaceih ni ah an thlah. Cozah nih thla 3 thong an bat. Pu Hrang Nawl a bia ceih lio ah Hakhapi ningin an chuak i culio kawl ram fitlaw le hlasa Zaw Wan Hakha a tlun lio nakin mi an tam deuh an ti. Hakhapi an chuak nain, lung hrapbaang tukin a kal taakmi le chunzaan in a ruah le a ngaihmi nufa hna muihmai le aw-aan cu a de ti lo.

1976 kum ah Pi Sui Hi a ṭhit ṭhan. 1978 kum in Aizawl (Mizoram) ah pawcawmnak kawl in khua an sa. 1986 kum ah hrinṭhaannak a ngei. 1987 ah Hakha ah an hung kir ṭhan i 1992 ah ‘The Church’ Khrifabu a dirh.Thantlang, Hakha le Matupi peng ah khamhnak thawngṭha a chim. Zei a tuah paohah aa biatak kho pengmi le hawi nakin a thiam khomi a si caah mi nih a bia an ngaih duh ngai. A zawt i a pum nih a celh lo tiangin thawngṭhabia a chim. ‘Pennak le Khrifabu’ kong fiang tein an hngalh khawh nakhnga i din thiam lo le damlo buin chunchun zaanzaan a chim. 2004 February in damlo aa thawk. Cuap khensar a rak si cang i 2004 December 1 ah a nunnak thaw a dong. Laimi lakah a kong ṭial ding tampi a ngeimi asinain a thlaan lung zong ah a min, a chuah le thih kum, ni le thla lawng nan hun ṭial lai tiah a ti hna.

Pu Hrang Nawl Hi MP a rak ṭuan lio ah siseh, thong a chuah hnu zongah siseh ram le miphun caah ralṭha ngai in rian a rak ṭuan. Lai Minister Pu Za Hre Lian nih Lai Miphun Ni February 20 cu kan hrawh lai i December 5 ah kan tuah lai a rak ti lio ah, “Kan Lai Miphun Ni kan hrawk kho lo, nan hrawk zongah Hrang Nawl a lung tling lo, tiah Roca nan chiah lai,” tiah a rak ti hna. Capt. Mang Tung Nung, Pu Vum Tu Maung le Pu Hrang Nawl hna an i zuamnak thawngin a tutiang kan Miphun Ni kan tuah khawh pengnak a si ti hi kan philh lo awk a si. Hakha Myodaw (Chin Ramṭhen khualipi) a hmunh khawhnak ding caah amah minthut in Ne Win sinah ca a rak kuat.

Pu Hrang Nawl a nunnak le sining ah midang he i dannak tampi kan hmuh khawh. Cu hna lakah:

(1) A nu pawchung in aw-aan a ngei

(2) Thla tlinglo in a chuak

(3) Lenvah a zuam lo (a no lio ah)

(4) Hruaitu si peng aa zuam (a no lio tein)

(5) Thluakṭha le ca thiam bik a si peng

(6) A tuahmi paohah a thiam kho bik a si (caṭial, hla phan te hna tiang)

(7) Hmual a ing kho (thong chungah hremnak hi cu an ka tlinh a ti.)

(8) Aa uah bik le aa ṭhum kho bik

(9) Pasal hawi sinah huham ngei bik

(10) Cawng/kai ṭung lomi ah Bible, Upadi le Political Sience a thiam bik

(11) Independence (luatnak) hmuh hnu ah cozah a do hmasa bik

(12) A lang thangchiat loin mah mithmuh le hmaitonh bakah fak awk si le fak, thlaak awk um

le thlaak  (a lan taktakmi) a hmang

(13) Mah ngeihchiah um loin tangka a hmang kho bik

(14) A bia aa let bal lomi le a bia ah a dir ngammi

(15) A chan lio ah ro a ling bik

(16) Hmailei thil a cuan kho bik mi lai paralṭha le miroling taktak a si .

(17) Nupi le fale nakin ram caah aa siang deuhmi a si.

Laknak : CSO, Malaysia

A ruah hlan ah Pu Hrang Nawl ṭialmi “Ka Zahpi Lo”timi tuanbia kan hun thlah colh lai.