‘Ngeihkhat Tthitumhnak Ah Kalpitu Ngei Lomi Nih Ka Sawm Dih U’ Nu Pakhat Nih A Ti, A Bia A Laar!

Washington ___ Sara Cunningham, kum 55,  nih a fapa ngakchia bik Parker Cunningham cu ngeihkhat pa dang a duhmi (gay) a si kha a theih tikah a cohlaang kho bak lo. A umnak kawhhran ah kum tampi thla an rak cammi cu ngeihkhat i duhnak tlaunak caah a si. A zumhnak le a fapa karlak ah duhthimnak a ngei. A fapa ai thim. A fapa ai thimning hmanh a sullam ai dang ngai te, biatakte in ngeihkhat tthitumhnak a dirpi lehlam, kum tampi a rak dohmi cu a dirkamh.

Ngeihkhat tthitumhnak pakhat a um i, an nulepa an ra duh lo. Cu thawngpang cu Cunningham nih a theih tikah LGBT tthitumhnak ah a kal duh lomi nulepa aiawhtu ka si lai, a duhmi paoh nih ka chim ulaw nan nulepa aiawh in ka ra lai, kan telpi hna lai tiah a facebook ah a ttial.

November, 2018 ah khan a voikhatnak ngeihkhat tthitumh lawmhnak ahcun a kal, atu tiangah 2019 chung ngeihkhat tthitumhnak lawmhnak caah tel dingin sawmtu hi pathum a ngei cang. A zumhnak a kaltaak hi kumli a si cang nain Christian ka si cu aa ti peng ko.

“Hi bantuk in ca ka ttialmi kha ka awlokchon lungsivangh aipuang buin ka tuahmi a si. Asinain, ka rak ttial kha atu ahcun a ttha ko ka ti. Nulepa dang tampi nih kan in dirpi ko timi bia zong tampi ka theih,” Cunningham nih a ti. Cunningham ca hmuh hnuah ai tthen cangmi i tthitumh tthan an i tim. Mi laar cheukhat nih an dirpi chap bei.

Note: Miraang ram cu lohtlau bak an si. Hi nu hna hi biatakte in ngeitkhat tthitumhnak ralchanh in a cawlcang i, an ram nun in a tlau naklai thla faakpi in a cammi a si nain a donghnak ahcun a dirpi biktu pakhat ah ai chuah tthiam. Chin ram ah hin  atu tiang ahcun ngeihkhat tthitumhnak a um ka thei rih lo. Asinain, ngeihkhat aa uarmi cu an tam lo nain, an um ziar ko, keimah hmanh nih kop li ka theih hna. Atu ahcun an hmai an i hup rih, an i thup. An hung holh ngam caan a um te sual lai ka phaang. Dirpitu zong atu tiang ahcun kan um rih lo. Dirpitu an tam hnuah an hung chuak lai i, “ee, ngeihkhat aa duhmi maw an si!!” tiin kan lau te hnga maw thinphaang awk a um ngai; atu chan kan vawlei minung nuncan ziaza kalning hi chim khawh bak kan si lo….

 

The Washington Post