Nitlaak Lei Ram Nih Cun “Na Sexy” Ti Hi An Uar Lehlam, Chinmi Nih Uar Ve Lo Ding!

Chan tiluan nih a kalpimi zulh ve lo hi tu chan ahcun ningzak phun ah a can lawng si loin hawi lawh lo bantuk in ruah a si. Taklawng hmanthlaak le zukcawl nih kan chan tilet bangin a kan hrawh i, atu le bang ahcun “na sexy ko ee” ti bawh in kan um, kan uar, poi ah kan chiah ti lo, minung phung a si ko cuh kan ti, chan tiluan a si le zei hme kan ti. Nitlaak ram pialsualnak kan zulh, kan i hrawm ve thluahmah cang, kanmah lawng si lo, vawlei pumpuluk nih nih zulh a si.

Thuh awk a simi kan langhter. A chin chinh awk a simi kan phongh. Huh ah ai dawh bikmi kan hlim. Hi bantuk in vawlei minung hi kan kal ko ahcun Pathian nih caan sau a kan zuah lai lo. Hmai chan le bang ahcun an “chiattha” hmanh mi mit hmuh ah an tlaang langh cang lai. Cucu Sertu Pathian nih a zoh khawh lai zumh a um lo caah vawlei chan hi a tawi tuk cang tiin kap khat lawng hmanh in cuanh khawh ngaingai a si.

Chiattha huh lo le taklawng  umnak hi canaan-mi khuachia biaknak ah a rak laar ngaimi a si. Hi bantuk sualnak nih vawlei minung a thurhhnawmh luan caan paoh ah Pathian hremnak a ra, Bible tuanbia nih a kan cawnpiak.

Ngeih khat nu/pa i duhnak hi kan Chinmi lak zong ah a hung um ngai cang ti hi kan theih a herh. An um ko nain kan nunphung he ai kalh tukmi a si caah an muici zapi hmuh le theih ah an thuh, kan thuhpiak sawh le si. Biatakte in hloh kan i zuam lo ahcun mi phun dang bantuk in kan buai ve te lai.

Atu kan chan, Chin-American/Chin-Miraang tam chan, sullam cu Chin nunphung le Miraang nun phung cawh chan a si. Kan i ralrin lo ahcun a pical deuhmi miphun nunphung nih a kan dolh te lai. Mi nawl caan le mi uar hi kan ziate a si caah biatakte in nunphung raal hi kan doh a hau cang.

Kereek tiang hnifenh hi Chin nunphung a si. Hnawng tiang angki i hruk hi Chin nunphung a si. Taklawng hmanthlaak le zukcawl dohnak bia chim tikah “naa felter, naa thiamter” timi nih kan dirhmun cu a fianh ngaingai ko.