Palestine Cozah Ralkap Le palik Nih Israel Ralkap Pahnih An Khamh Hna

Israel ralkap pahnih cu lam an i palh ruangah Palestine Jenin khua laicir bakah an va chuak, Israel ralkap pahnih hna cu nu pakhat le pa pakhat an si. An motor he Palestine khua chung i an va luh sual tikah Palestine pa pawl nih an chuah hnawh hna i lungin heh an cheh hna. An motor thlalang zong an khuai pat, Israel ralkap pahnih cu an ai, bawmh hal in an ttah buin an au. Palestine cozah ralkap nih an zuan hnawh hna i Israel ralkap pahnih cu an khamh manh hna tiah Palestine ralkap nawlngeitu nih an chim.

Palestine ralkap le palik zakhat renglo nih Israel ralkap pahnih hna cu an rak chuah hnawh hna, Israel ralkap pahnih lungin a cheptu Palestine pawl cu heh tiah Palestine ralkap le palik nih cun an kham hna, an thlauh hna. Caan saunawn hnu ah Palestine pa pawl cu an dai i Palestine ralkap ralkap nih Israel ralkap pahnih hna cu an lak hna, cu hnuah Israel ralkap sakhan ah an va chiah tthan hna tiah The Jerusalem post nih a langhter.

Israel ralkap pahnih hna i an i citmi motor zong Israel ralkap sakhan ah kan va chiah tthan tiah Palestine ralkap pawl nih an chim. Israel ralkap pahnih hna cu fak lakin hliamhma an tuar, nu le bang cu a hmai hi thi lawngte a si. An meithal pahnih zong Palestine pa pawl nih an lak piak hna.  Israel ralkap sakhan an phak pi hna hnu ah siizungah an pahnih tein an tlop hna tiah Israel ralkap leinih an chim.

Israel ralkap pahnih kan khamh hna a ruang cu ” zeibantuk minung an si hmenhah an thih ding hi kan duh lo, ralkap nunnak khamh cu kan rian a si. Cun mithah le lainawn cu pathian nih a kan thlauh mi a si. Israel ralkap pahnih hna hi lungchehnak in thi sual hna sehlaw a dammi Israel ralkap nih Palestine khua ah faktuk in buainak an chuah fawn lai. Cucaah Israel ralkap pahnih hna hi nung dam tein kan khamh hna nak a si tiah Palestine ralkap leinih an chim.

Israel ralkap lawn siloin Israel mipi zong lam an i palh i Palestine khuachungah an lut sual lengmang. Palestine cozah ralkap nih minung ceilak Israel ramchungah an rak chiah tthan cang hna. Kum 2017 January 1 in November 8, tiangah lam i palh sual in Palestine ramchungah a rak lutmi Israel rammi pawl hi minung 564 an si cang. An zatein Israel ramah kan chiah tthan tawnhna tiah Palestine ralkap nih an chim.

Ref: The Jerusalem Post

error: Fir tim hlah, Share lawng ngah !!