Pogba : “Turin Hi Ka Inn A Si, Juventus Player Pawl He Kan I Chawnbia Peng Hna”

Manchester United cu Champions League ah Italian club Juventus he chuih dingin Turin khuapi ah an tlawng lai i, United nih kum 2016 ah Juventus sinah an rak cawkmi French laikal Paul Pogba nih kum 4 chung caan a rak hmannak Turin khuapi cu a inn bantuk a si kong a chim.

Pogba nih, “Ṭhal chungah khan ka unaupa he kan i chawn i, Champions League ah hin Juventus he group khat ah um ka duhnak kong ka rak chimh i, cu ka saduhthah cu atu ah a tak in a cang. Ka caah cun lawmhnak a si, a ruang cu Turin hi ka inn a si i, ka professional kawl hmasa bik ka khumhnak zong a si fawn,” a ti.

Kum 25 a simi Pogba nih hin Juventus player hna he an i chawnhbiak pengnak kong chim in, “Cuadrado, Dybala le Bonucci tehna he hin a caancaan ah kan i chawnbia tawn hna i, chungkhar bantuk kan si hna ruangah kan i chawnbia lengmang hna. Juventus ka rak um lioah khan Pirlo, Buffon le Chiellini te sinah ka chuih i, anmah bantuk sin chuih ah khan cun i cawn chap lengmang dah ti ko lo cu tuah awk ka ngei lo. Nifatin in training tuahnak ah an cawlcangh kan hmuh i, player puitling si cang ko hmanh ning law, anmah sin hin cawn awk a um peng ko,” a ti.

Pogba hi kum 2009 ah khan United academy ah a rak lut i, kum 2012 ah khan a thlawn (free) in Juventus ah a rak lut. Kum 2016 ah khan United nih Pogba hi footballer manfak si dingin an rak cawk ṭhan. Pogba nih hin Juventus ah kum 4 a um chungah khan Serie A title 4 le Copa Italia title 4 a lak manh i, United a luh hlan kumah hin FIFPro World XI ah a min a rak itel fawn.

Pogba hi United a luh hnuah thawngpang a ngei ngaingai i, United manager Jose Mourinho he an i hmuh thiam lo caan a tam ngai fawn. Hiti a si ruangah hin Juventus ah a kir ṭhan lai tiah media pawl nih an chim a tam ngai cang nain Pogba nih hin United cu a inn a sinak kong le hmailei zongah a inn a si peng ding kong a chim ve lengmang fawn.