A Ruh A Ei taktakmi Par Tha Iang Chin Kongah A Pa He Biaruahnak

Par Tha Iang Chin : Kum 9
Unau ngeih zat  : 4 (nu 2 le pa 2; upa bik a si)
Umnak            : Mahkota, Cheras
Nulepa min      : Pu Kap Hmung (Vombuk, Mizoram) le Pi Dawt Hlei Sung (Khampat)

Zeitik kum ah dah Malaysia nan phak?
Kum 2011 ah khan Malaysia ah kan phan.

Zeitik kum in dah hi bantuk pahrang (talent) hi a thiam?
Malayia kan phak kum (2011) ah khan phone chiahrute kan ngei le hi bantuk pahrang hi a hmuh le a cawng lengmang. Kei lebang nih cun holh hna kan thiam tung loh le nai hrawh sual ahcun siizung kal hna a hau lai sual lai tiah ka rak thlauh tawn. Nain a pahrang teh a si ko lai, mah ti khan a tuah lengmang.

Zeitik kum in dah mipi hmai a piah?
Kum 2014 CND ah khan avoi khatnak a rak piah.

Mipi hmai ah voi zeizatdah a piah cang?
Kum 2014 CND, CCF Church School khawmpi le tutan CND hi a si. Kum 2015 ah khan US an kal cang tiah kan thawng an rak theih. 2016 ah khan kan thawngpang an hun hlat i Malaysia kan um rihmi an theih tikah an hun sawm thannak a si.

Hi bantuk thil a tuahmi hi a nulepa nih thazaang nan pe tawn ko lo maw, asiloah ai hrawk sual lai tiah nan thin hna a phang tawn maw?
Kum 2014 lio kha avoikhat piahnak a si i Pathian nih pahrang a pekmi hrimhrim a si ve ko hih tiah, thazaang kan pek ngai ko. Atu bantukin sawmnak a hmuh caan zongah kan nupa in kan zulh tawn.

Hi bantuk pahrang a piah caan ah hin laksawng hna an pe ve tawn maw?
Kum 2014 CND a rak piah lio ah khan committee nih RM 1480 a si, cun lawinak taxi fare zong a rak kan liampiak rih. Kum 2014 thiamthiam CCF Church School khawmpi ah an hun sawm ve le RM 480 an rak pek. Nizan CND (2017) ah khan committee RM 100 an pek. Cun innleng ah hman a thlakpitu mipi tlawmngai pawl nih RM 900 renglo an pek.  An cungah kan i lawm tuk hringhran.

A tuah ningcang hi teh a nulepa nih nan chimmi maw si, asiloah amahte in a hmuhmi a cawn chommi dah an si?
Hihi kanmah nih cun kan theih balmi a si lo tikah, a chimhning zong kan thiam loh. Amahte in phone ah a hmuhmi kha amah zuamnak bak in a cawn chommi an si.

Hi a pahrang hi nikhat ah voi zeizat dah a tuah tawn?
A hmasa ah khan cun zingka ah hin ka kengfah tuk a ti i a tuah kho tawn loh, nain atu ahcun zinglei zongah a tuah pah ve lengmang cang.

Hmailei a caah saduh nan thahpiakmi?
Hi bantuk hi amah zong ai zuam tuk ve i Bawipa nih lamhruai sehlaw kanmah zong nih biatak tein hmailei a karhlannak ding cu bawmhchanh khawh kan i zuam ve. Kei zong nih, hi bantuk pahrang hi Pathian nih kan Laimi lakah nangmah lawng an pekmi na si. Cucaah na philh bak lo a hau. Hi nak let thiam dingin, biatak tein nai zuam chinchin lai, nikhat ah voi 2 na tuah ahcun na minthang ko lai tiah kan forhfial lengmang ve.

Ramthumnak lei teh, zeidah nan phak cang?
2013 card ai tlaihmi kan si i voikhat hmanh an kan au rih lo.

Caan na kan pek caah kan i lawm tuk.
Kanmah zong kan i lawm tuk.

Chapchihmi : Hi bantukin kan naunu sinah Pathian nih pahrang a pekmi hi kan Laimi caah thluachuah sunglawi tuk a si. Cucaah kan Laimi nih thazaang pe in, puai sunglawi kan tuah caan ah a thiamnak hmuhsakter dingin sawm lengmang hna usih. Cun miphun dang le vawleipi nih an theihhngalh khawh nakhnga a konglam hi media tampi ah langhter in a video a ngeimi nih Youtube hna ah thlahpiak khawh zuam cio hna usih.

Nizan Malaysia CND ah upa hna nih an sawm than bangin a nulepa, a naule he an chungkharte in an ra hna i laksawng ah CND Committee nih RM 100.00 telawng an pekmi hi cu ai dawhcah lo ngai.