Thantlang Khua: Kan Sifak Nain Kan I Nuam Tiin Khualu ah Signboard Nganpi Nan Tarmi A Sullam Nan Nganh Cang.

Hi a sullam hi phundang in chim ahcun vawlei chawva cun kan sifak ko lai nain kan miphun caahcun thih tiang lungkhat thinkhat tein kan dir lai caah kan thinlung cun kan rum ko ti khi hei sawhter duhmi ka lawhter. Cuti locun a sifak komi nih miphun le ram caah ( သစ္စာ ngei lomi) zumhtlak le fel tein a dir fawn tung lomi nih kan i nuam ko tiah an langhtermi lawmhnak hi zeibantuk ah dah an i lawmhnak te hi a si hnga ti hi ruah awk in a um ngai cang. Sifah chinchap ah zeihmanh tuak loin a nuam thothomi chungkhar pakhat menmen bantuk khi maw a si hnga.

Thantlang khuaah Aung San milem an bunh cang lai ti a si. Thantlang khua cu ka chuahnak khua a si caah hi thil an tuahmi cu ka lung a ka doh ngaingai ve. Cucaah ka hmuhning le ruahning a donghnak ah tahchunnak in pahnih van langhter than ko ning.

Judus Iscariot nih Jesuh cu a zulh caah hawi mipi nakin a sining a thei deuhtu a si nain a theih lomi pakhat a um. Thlarau mit in Pathian fa a si kha a hmuh kho lo caah Jesuh hi zeizat man dah a si ti a thei lo i ngun tangka pia (30) tein a rawi/zuar diam hi a si.

Image may contain: plant, tree, outdoor and nature

Ramkhel mit in kan miphun, kan vawlei caah pumpeknak he kan thisen thlet in ram kan khelmi hi kan theih ve ko, miphun kan dawt ve ko nan ti lai nain nan theih lomi pakhat a um ve. Cucu Ramkhel mit (naingaizi miatsih in) kan miphun nih chawva, fimnak le ruahnak, nunthapnak he lungthin dihlak tiang pek in dirhkamhmi kan ram le miphun caah kan khelmi ramkhelnak timi a man (Valua) hi zeizat man dah a si ti nan hngalh lo caah hi Aung San milem le Ks. Ting 300 man in Thanthlang khua muisam a lang patlang in tamh nan timh hi a si i hihi Judas nih Jesuh cu ngun tangka pia 30 in a zuar/rawi bang sipin nih kan miphun le ramkhelnak thlanhripi a man (Value, Dignity) vialte cu Ks. ting 300 men in nan kan zuar/ rawi hi a si ve ko cang.

Sipin cu ramkhel rianah tel loin thianghlim tein sipin rian a tuanmi kan si nan ti nain nan i lakmi rian cu ramkhel rian lakah a murupi nan i lak. Cucu nan ngal lo. Nan hngalh zongah nan pah chih cang.

Thantlang khua mipi leiin a duh lomi an tlawmte tiin nan tuahmi cu hi ramkhel thil hi mithmuh thilri bantuk ah maw kan ruah. Chin miphun hna hi ramkhel mit lei in zeitlukdah khua kan hmuh khawh le hmuh khawh lo hi kan theih tuk cangmi a si ko tung. Ramkhel thil hi mipi nih an hmuh khawh lo hmanh ah hruaitu tal nih cun hmuh khawh ding a si. Cu ramkhel thil cu lenglei in ai dawh ngai te ding pangpar dum le milem pinlei ah a ummi a si. Joshua le Caleb lawng an miphun hna zungzal hmunkhuarnak ding caah ram an khelmi Canaan ram cu hruaitu (12) lakah anmah pahnih lawng nih a thatnak long si loin tei khawhnak ding lam cu an hmuh khawh. Thlarau mit in an zoh caah kan tei hna lai ti an zumh. Mipi cu ramkhel ah hruaitu nakin a mitcawmi an tam deuh caah hibantuk dirhmun ah cun ramkhel leiah a mit a deimi hruaitu nih cun miphun caah lungrual tein kan dirti ko ahcun hi nakin ai dawh deuhmi khua le ram ser dingin kan hmaiah hmun le caan a um ko ti hi hmuh khawh chung ve ding a si. Cutincun kan miphun caah lungkhat thinkhat in umkal ti lawngah cun pei kan sifah zongah kan sifahnak, kan lungretheinak, kan duhnak kan i hrawm hnu lawng ahcun pei thinlung ah kan i nuamhnak cu a tlin hnga cu.

Hlawhhlangnu cu tangka duh ah a sinak vialte kaltak in mipi hmaiah ai zuar. Lenglei dawhnak le nuamhnak men lawng a duhmi nih cun an hmuh tikah an mit a thi. Ai dawh tuk ee an ti i a uarmi cu an tam tuk ve ko. Cubantuk caan khatte hlawhtlinnak le nuamhnak men a duhmi minung cu an um ve caah a sinak ai zuarmi le a fuhtu cu an um taktak ve ko. Cucaah hlawhhlang muidawh nu cu a aurmi le a fuhtu mipi an tampi ko lai. Nain a personnality sinak a man, teihkha (Valua, dignity, credit) vialte tangka in a zuartu nu cu minung kan sinak ah a biapi cemmi kan sicannak kan man le teihkha a zohmi nih cun lenglei dawhnak lawng a zohtu pa he kan cuanhmi le zohmi ai dang. Hi lenglei nuamhnak ahhin maw Thantlang khuanu khuapa hna nih kan sifak nain kan i nuam nan ti duhnak a si hnga. Asiloah nan i tinhmi dah nan nganh cang tinak a si deuh?

Hi thil hi a hramthawk lawng a si rih. Atu hmanh in kan hrampi (foundation) hi a hman ti lo. Kan ramkhel ning hrawh hram kan i thawk cang. Kan ram that lei a panhte tikah cun miphun a value, credit le dignity dirkamh in bia a chim i tangka a hmang kho lomi cu dohtu ah mipi nih ruah an si chin langmang te lai i hibantuk in kan miphun le ram caah a dirmi Hero pawl zong Zero ah kan van chiah chin lengmang te lai. Cu dirhmun kan phak thluahmah te lai dingmi ka cuanh ah kan Chinram caah hnangam in um khawh cu a si hrim ti lo.

Thanthlang khua kan signboard ning cun Chin miphun caah zohchunhthlak in a dir ding kan lo nain kan miphun sinak vialte manfawi tein a zuartu dirhmun ah kan dir ko cang. Kan miphun nih khua thuk deuh in ruah kan hau ko. A ruang cu kan tuhmi thlaici le tuanbia cu kan tuh bangin kan miphun nih kan zuun te ko lai.

Catialtu: Al Bik Lian Zathang