Thawhthan Ni ( Easter Sunday) Ah Minung 138 Nunnak A Liam

COLOMBO, SRI LANKA — Vawleicung Khrihfa mihna caah a sunglawi taktak mi Thawhthan ni ( Easter Sunday ) cu mi cheu caah ngaihchiatnak le sung za tlak taktak mi ni ah ai chuah. Thawhthan ni ah Khrihfa biakinn pathum chungah le Hotel hmun thumah ralhrang nih bomb an puah , minung 138 renglo an thi tiah VOA nih a langhter.

A thi mi hi a tamdeuh cu biakinn ah ai pummi le Hotel ah a tlungmi khual deuh pawl an si tiah Sri lanka nawlngeitu nih an chim. Hi thil a cannak hmun hi Sri Lanka ram, Colombo ah a si tiah VOA nih a langhter.

A tutiang ah ralhrang lei nih kanmah nih kan tuah mi a si tiah ai phuangmi ralhrang leiin an um rih lo. Bomb an puahnak biakinn hna cu Negembo khua i a ummi St. Sebastian’s Church , Colombo khua i Catholic pawl biak inn ah le Batticaloa khua i Zion Church ah a si tiah Sri Lanka nawlngeitu nih an langhter.

Hi bom puahnak ruangah minung 138 renglo an thi, a dang minung 100 renglo nih hliamfak an tuar tiah VOA nih a langhter. Bom puah tu hi mi zei sat dah an si timi theih an si rih lo caah palik nih dotthlatnak an tuah cuahmah lio a si.

Khrihfa mi nih kan i ngaih taktak mi Thawhtthan ni ah a tubantuk in thih le loh Khrihfa mi nih ton hi cu tuar a har khun ko.

Ref: VOA, ABC news