Tuzan Champions League Ah Juventus Maw Na Zumh Deuh Spurs Dah?

Europe leiṭhen chung club i zuamnak sunglawi bik Champions League last 16 cu tuzan ah hin chuih a si cang lai. Malaysia caan in tuzan suimilam 03:45am ahhin Serie A table 2nk a simi Juventus nih an celhtual ah Premier League table 5nk a simi Tottenham Hotspur an mikhual hna lai.

Image result for Juventus vs tottenham

Nehnang le hmuhton in tah ding a si ahcun Spurs nakin Juventus an sunglawi deuh – asinain Spurs boss Mauricio Pochettino tahfung tu ai dang ve. Argentine manager nih, “Arsenal asiloah Manchester United na tei hna ahcun Europe chung club ngan bik pawl he chuih dingin nai za cang tinak a si,” a ti.

Spurs boss biachimmi hi zeirello awk a ṭha lo – London club nih hin Premier League an puai donghnak 3 ah pehtlai tein Manchester United (2-0), Liverpool (2-2) le Arsenal (1-0) he puaiah result an hmuh i, Reds lawng an tei hna lo – tuzan ah hin i zumhnak thinlung he Turin an panh lai.

Image result for tottenham vs arsenal 2018

An i lo lo
Europe chungah hi team 2 nehnang cuaitlai ahcun an i thlau ngaingai – Juventus hi a hnu bik season 3 chungah voi 2 Champions League final an lut kho i, Spurs ca tu ah hin cun UCL ah voi 3 an chuihnak telawng a si rih.

European Cup timi min bunh a rak si lioah Spurs hi semi-final an rak phan ve cang i, Champions League ti a si hnu 2010-11 season ah khan quarter-final an rak phan i, cucu a sang bik an phak a si. Cu ruangah cun tu season ah hin record thar ṭial an duh lai.

Image result for tottenham players Champions League 2010-11 season quarter-final

Juventus nih hin Champions League hraidawh voi 2 an cawi cang i, a hnu bik final an luh i an tei lomi cu Spanish club 2; Barcelona le Real Madrid an si. Serie A ah season 6 chung pehtlai tein an champion cang i, ‘Champions League’ hraidawh cawi hi an duh ngaimi a si.

Hmuhton canah zumhnak 
Mitam deuh nih Spurs cungah zumhnak an chia ngam lo a si kho men ko. Asinain, London thlanglei kam club nih hin Group H ah hmahruaitu si buin last 16 lut dingin Real Madrid le Borussia Dortmund an lonh hna ti kan philh awk a si lo – point 18 in 16 an hlawh khawh.

Image result for juventus players

Spurs boss Pochettino nih, “Juventus hi team ṭha an simi kongah i al awk a um lo. Europe chung club ṭha bik hna lakah ai telmi an si i, player hmuhton a ngei taktakmi, Champions League boruak sang a dawp lengmangtu tampi an ngei hna i, annih hi season 3 chungah UCL final voi 2 a kai khomi an si.

“Kannih hin cubantuk hmuhton vialte cu kan ngei ve lo. Asinain, kan i ruahchanmi le kan i zumhnak kan langhter lai. Nai kan puaiah kan chuihning a ṭha hringhran i, Juve caah rian harsa serpiak dingin biatak kan chuah lai” a ti.

Image result for juventus champions league trophies

Raldin a herh
Tuanbia hlun zoh tikah hmuhton leiah Juventus an ropui deuh ko nain Turin club manager Massimiliano Allegri cu a bia a puam duh lo. Italian manager nih, “Quarter-final luh hrimhrim kan duh, asinain kan i ralrin a hau lai” a ti.

Image result for Massimiliano Allegri

Kum 50 a simi manager nih a biapeh in, “Spurs nih hin chuih ningcang ṭha ngai an ngei i, kan chuih dingmi puai hi Champions League a si fawn ruangah a har ko lai. Voidang vialte nak ṭha deuh in kan chuih a hau lai” a ti i, Spurs a nek duh hna lo.

Club pahnih hi zuamnak puaiah an i tong rih bal lo i, tu season thok hlanah khan i hawikomhnak puai (pre-season friendly) tu ah an i tong – Wembley celhtual puaiah hin Spurs nih 2-0 in an tei hna.

Player cuaichunhnak

Image result for Harry Kane
Spurs nih hmaikal ah an i bochan dingmi cu puai 33 chungah kawl 32 a khumh khotu Harry Kane ṭhiamṭhiam a si ṭhan lai i, English hmaikal a bawmtu dingah hin Dele Alli, Son Heung-min le Christian Eriksen te an si lai – Giorgio Chiellini hao in Juve hnutlar caah i venhim a hau lai.

Poch nih, “Vawleicung player ṭha bik hna lakah ai telmi a si” tiah a chim tawnmi Paulo Dybala dirhmun a fiang rih lo i, Juve hmaikal nih hin hliam a tuar ruangah an puai donghnak bik  Fiorentina an tei hna lioah a rak chuih kho lo. Allegri nih a player hi a dam manh a zumhnak kong a chim lioah ‘risk’ lak ai timh lonak kong zong a chimchih fawn.

Image result for paulo dybala injury

Dybala hi a chuih khawh lo zongah Juve nih Gonzalo Higuain le Mario Mandzukic an ngeih rih ṭhiamṭhiam hna i, Spurs hnukham Jan Vertonghen le Ben Davies te caah hnangam tein um awk a ṭha lai lo.

Be the first to comment

Leave a Reply

Your email address will not be published.


*