US State Hmun Tampi Ah ” In God We Trust” Timi Ttial Le Tarnak Nawl An On Cang

USA hi state 50 a um i state cheukhat ahcun US phaisa ah an ttial mi “In God We Trust” Bawipa Kan I Bochan timi biafang khi an doh ngaingai. Asinain State cheukhat hna ahcun an phaisa lawng hmenh ah si tiloin Public sianginn le building pawl tiangah ttial le tar thluahmah a si cang tiah CBN news nih a langhter.

Florida state hna ahcun an state upadi bak nih a onh, public sianginn kip le inn kipah langsar taktak in ” In God We Trust” timi biafang an tar hna tiah CBN nih a langhter.

Arizona state i an sianginn kip zongah ” Bawipa Kan I Bochan ” timi biafang cu tarnak le ttialnak nawl an pek hna. Arizona state ahcun Latin holh in an ttial . Latin holh cun “God Enriches” ti a si. Hi biafang cu Sianginn kip caah i an hruaitu dingah hmanmi biatlangtawi “motto” asi lai tiah nawl an pek hna.

State dang tampi zong nih kan sianginn le inn kipah hin Bawipa nih a kan umpi ko ti theihnak dingah ” In God We Trust” timi biafang hi phungning tein tar an duh cio ve hna tiah CBN nih a langhter chap. Cheukhat State ahcun “In God We Trust” ti lawng hmanh siloin Ten Commandments ” Nawlbia pahra” zong kha sianginn kip le innkip ah tarnak nawlngei dingin State cozah sinah an hal hna tiah an langhter chap.

Arkansas State hna ahcun kum 2017 lio khan In God We Trust timi biafang hi sianginn khan chung kipah tarnak nawl an rak pek cang hna. Hi thil kan tuah mi cu kan ram mipi nih khoika in dah kan rat i kan hrampi hi zeidah a rak si timi hi thei hna usih ti kan duh caah a si tiah Arkansas state Rep. Jim Dotson nih a chim.

“In God We Trust” Bawipa Kan I Bochan timi biafang sianginn kip le inn kipah tar le ttial nak nih hin kan fale an mit a au ter hna lai. US rampi hi a hodah a rak hmu tu a si timi le a hodah a rak dirhtu asi timi hi hmailei ah kan fale nih fiang tein an theih khawh nak hnga “In God We Trust” timi biafang hi kan tarnak a si tiah  Florida state Rep. Kimberly Daniels nih a chim .

Pathian cu a hramthok le a dongnak a si, cu Pathian cu kan fale nih an theih herh. In God We Trust timi biafang nih kan fale an mit a au ter hna lai i zungzal nunnak lamah a kalter tu hna ding zong a si tiah Florida state Rep. Kimberly Daniels (D-Jacksonville) nih CBN news ah a chim.

Ref: CBN news