Zawtfahnak A Ngeimi Hna Caah Thazaang Laknak: “Nihin Cu A Nuam Tuk Hringhran Lai”

Voikhat cu America ram Manhattan khuapi ah putar pakhat kum 75 cu lam a tan (phiat) lioah Taxi nih tlu lakin a suk sual i chawnh manh loin a thaw a cat colh. Chekhlai dingin a paw an khuai tikah cun, Doctorpa a khuaruah a har hringhran.

Putarpa fanu sinah cun, “Na pa nih hin a pawchungah zawtnak a phunphun a rak ngei i, hi ruangah hin a liamciami kum 20 hrawngah khan rak thih cang ding a si nain, nang nih cun nihin ni tiang a ngandamnak a ṭhami ngai le a ṭhawng ngaimi a sinak kong na chim fawn. Zeidah a ruang a si ne hnga?” a ti. Putarpa fanu nih cun, “Ka hngal hrim lo. Amahbelte cu zingfatinte hin, ‘Nihin cu a nuam tuk hringhran lai,’ a ti lengmang tawn” tiah a leh.

Doctor nih, “Cucu a si hrimhrim lai, a pumchungah zawtnak phunphun a ngeih ko bu zongah nuam tein a damtertu cu!” a ti. Putarpa nih cun nifatin in a chiatnak leikap in thil a ruat bal lomi, a ceunaklei le a nuamhnak lawng tein saduhthahnak a ngei tawnmi a sinak cu nunsaunak ah a rak hman diam.

Patling pakhat cu a ngandamnak a ṭha ngai in ai ruat tawnmi a si i nikhat cu ruahlopi in blood sugar (glucose) a ngeih le ngeih lo a vai chekter. Glucose cu a rak ngei taktak i, a sang ngaingai cang, random-in 370 bak a rak si diam!

A lungrawk tuk i, lungrethei ngai in a um. Taxi in a lawi i, an inn panhnak step zongah cun hruai chom lawngin a kai kho. Cu hnu thok cun ngandamlo ngai khin ai hngalh cang. Cu tikah, ai nuam kho ti lo. Zeizong vialte hi zeihmanhlo ah a ruah cang hna. Hmailei ruahchannak hrimhrim a ngei kho ti lo. A hnuah cun zawtnak dang, pawpi fahnak nih a hun tlunh hnawh chap cang. Cu tikah ngaihchia ngai in a um zungzal i, a rauh hlanah a nunnak a dih thai.

Miṭhenkhat cu a zaw bantukin an i ruah caah an zaw thai i, zawtnak dangdang zong nih an tlunhnawh a fawi khun hna. Asinain, miṭhenkhat hna nih cun zawtnak an ngeihmi zong an i salter (kuahpi) duh lo. An lungthin chungah cun an zawtnak nakin an damnak a simi Jesuh Khrih tu kha ngan deuh in an chiah i, a ceunak leikap tu in khua an ruat tawn. An caan tonmi poah pahchih dingin le nuam tein hman an i tim hramhram tawn. An i nuamhnak ding thil lawng an ruat i, cucu hlawhtlinter khawh zong an i zuam fawn. Cucaah zawtnak an ngeih ko bu cun caan saupi tiang an dam tawn hna.

Miṭhenkhat lebang hna cu a dam hmanh an i dampi thai hna. A cunglei kan chimmi putarpa zong nih khin, “Nihin cu a nuam tuk hrinhran lai,” tiah nifatin in a chim tawnmi bia nih nifatin a nun a nuamhter i, cu nih cun zawtnak phunphun ngei ko hmanhsehlaw kum tampi a damter phah.

Nifatin in minung sang (ting) tampi an thi lengmang tawn. Asinain, nang le kei tu cu nihin ni tiang nifatin minung sang tampi a thimi hna lakah kan i tel ve lo. Kan thih ve lomi hi Pathian vel thawngin a si. Bawipa dawtnak a fekmi cu a dong hrimhrim lai lo, a zaangfahnak zong a cat lai lo; Zing fate in an thar lengmang, zumhtlak a sinak cu a lianngan hringhran. Ka ngeihmi dihlak cu Bawipa hi a si ko, ka ti; cucaah amah cu lungsau in ka ngan ko lai” (Tahnak hla 3:22-24).

Cu ruangah cun hngngam tein nifatin kan nunnak hi nuamte le thadam tein hmang lengmang ko hna usih.

Careltu vialte, Bawipa nih damnak in pe ko hna seh.