ZEITLUK INDAH A NU NIH A DAWT

Khua pakhat ah nuhmei nu le a fapa te an rak um. Cu nuhmei nu te cu a mit khatlei lawng a ttha i, khatlei a mit tu cu zohchia ngaiin a caw i khua a hmu kho ti lo. Anu nih hin a fapa te hi a sianginn kainak ah a va thlah tawn. Cu hngakchiapa te cu a hawile cheukhat nih, na nu hi mit khat lawng a ngeimi pei a si hi tiin…nehsawh capo khin an rak ti tawn.

Cu ruangah, a fapa te cu a ningzak i a nu cu a zahpi ngai. Anu nih sianginn ah a va thlahmi le lengchuah kal-um tti hi a duh lo ngai tawn. Anu nih le a fapa ngeichuun dawttukmi asi tikah a lungre a thei tuk ve tawn.

Caan tlawmpal a hung liam cun a fapa te zong cu cataang saang deuh a hung kai ding si. Anu nih hin a fapa te a zoh ah hin ai lunghmuih tuk; kei i ka nunnak (ka life) cu hi ka fapa te hi a si ko a ti. A thazaang diklak le thlentipawt in fak piin rian a ttuan ko nain ka fapa dawt caah cun a ti i a thaanuam zungzal. Cuticun, a caanzat in a fapa te cu khuapi ah cun sianginn a von kai i, cathiam ngai ah a von i chuah. Hawikom le theihhngalh tampi a von ngei. Innsaklei ‘engineering’ a von ngah. Nungak (darling) zong a van ngei. A nungak nu te nih cun a chungkhar kong a van hal tikah nu le pa ka ngei hna lo a ti. Aruang cu, sunghno a nu kong a chim duh ti lo; a zahpi chin lengmang cang; ka hawile le ka ‘darling’ nih ka nu kong hi an theih sual lai ti hi a phan in a phaang cang.

Nupi ngei ding a van si cang. Alangtlang cun a nu cu thawng a hei thanh; atu hi nupi ka ngei cang lai. Ka nupi tthit-umhnak ah na rak ra hrimhrim lai lo; pehtlaihnak zeihmanh na van ka tuah fawn lai lo; zeitik hmanh ah kan inn zong na rak ra hrimhrim lai lo; aruang cu, nu le pa ka ngei lo tiah ka chim cangmi a si; nangmah hi, ka nu na si tiah an in theih cun thilsining a rawk dih ding a si, tiah a fapa cakuat a van rel ah cun sunghno a nu cu nguingui thlak in a thinlung kekkuai dihlak in a ttap ruangmaang. Maw!..ka fa dawt, kei ka caah nang cu ka nunnak (life) na si a ti i…a thinlung fah hi a celh in a celh hrimhrim lo; nain ka fa nangmah ca i thilttha a si ahcun na chimning in si ko seh tiah a lungchung tein mitthli he amah le mah intuar khawh tu aa zuam.

Cuticun caan cu a vung liam thluahmah i a fapa zong cu fa pahnih a van ngei ve cang. A sining-dirhmun a hung saang ching lengmang. Amit khatlei a cawmi sunghno a nu kong cu a ruat hrimhrim a ruat ti lo. Sunghno a nu tu nih cun a fapa te kong cu a ruat zungzal ko; ka fa a dam hnga maw; harsatnak hnga a tong sual hnga maw; lungrethei in a um sual hnga maw…tiin..khuaza ruah buin zaan-ih merem kho loin a um caan tampi.

A fapa dawt cu a ngai tuk hringhran cang; a nupi le a tu-fa le tete zong hmuh a duh tuk hringhran cang hna. Cucaaah, an khua in aa thawh i, a fapa le umnak khuapi a va phan. A fapa le inn cu a kawl cikcek hnuah a va hmuh. Lamnai te khin a hei zoh i, cu inn hmai te ah cun hngachia tete pahnih lente an rak i celh len ko kha a hei hmuh. Aw…! mah khi ka tu le tete pei an si ko khi a ti i, aa nuam tuk hringhran. Tlawmpal a van naih deuh hna ah khin hngachia pahnih nih cun an von hmuh i a mitkhat lei a um lomi, a cawmi a si tikah an ttih tuk i innchung ah an lut. Hngakchia pahnih cu van i hruai buin aa dawh ngaimi nu a hung chuak; hngakchia nih cun, ka nu, mah tarnu hi kan sinah a ra i a kan zoh peng cuh, tiah an hei chimh. Tarnu nih cun a fapa nupi si kha a van i fiang colh i a thinlung in aa nuam tuk hringhran.

Sinain, thilsining an theih lai i, ka fapa caah a ttha lai lo ti a phaang. A fapa nupi nih cun, hmaipanh tein ka nu zeidah herhmi hna um ma…tiah a van chawnh hnik ah khin, ka fa a tu hi lam ka tlau i, inn ka van i palh caah a si. Ka kal colh ko lai mu..a ti i cuticun, a fapa le chungkhar hna cu a van hmuh ta hna i, khualei ah cun a tlung tthan. Cu tlawmpal ah cun, a zaw i ka nung ti lai lo tiah aa ruah caah a innpa nu sinah a chimmi cu: a tu hi ka thi ko lai tiah kai ruat cang; cucaah, mah thingkuang hmete hi ka thih hnuah ka fapa na run pek te lai tiah a chimh ta i, cuti te cun a nunnak a dih.

Caan tlawmpal a liam hnuah a fapa cu an rian konghe pehtlaiin a nu umnak khua a hung phan. Asinain, sunghno a nu tu cu a rak um ti lo. Mitthli he innpa (neighbor) nu nih thilsining a van chimh pah in thingkuang hmete cu a van pek; mah hi na nu nih a thih lai te ah, ka fapa nan rak ka pek piak te lai tiah a kan cah tami a si, tiah a van chimh. Thingkuang cu a van on i catlaap tete a van hmuh; a van zoh i, sunghno a nu nih amah caah siizung ah a mit a rak ‘hlut’ nak ‘document’ catlaap tete a rak si. A khuaruah a har tuk hringhran cang! Aw..! ka hngakchiat lio te ah ka mit a rak rawk i, ka nu nih pei a mit a rak ka pek ko hi, timi a hun i fiang colh. Mit khat lawng ngei ding ka rak si nain ka nu dawtnak ruangah tlamlting tein mit hnih ka ngei hi ta, ti a hun hngalh. Keimah ruangah ka nu hi mit khattalei ngei loin pei a rak um hi…a hun ti..! aw..!ka palh tuk hringhran tiin a mah le mah a ttang ai cum. Hi tluk sunghno ka nu dawtnak a nganmi hi…a ti…i, nguingui thlak in a ttap tluahmah ko. Zeitlukindah a nu nih a dawt timi a van theih tikah cun zeisan a tlaih ti ttung lo…!sunghno a nu cu leidai tang ciamser ai cang cu ta…!

Nulepa dawtnak hi zeitik hmanhah cham khawh hna ding an si lo. Kan nulepa an damlio le an nunchung teah fale nih kan dawt taktak hna ding an si. Nulepa dawtnak caan thei lo in kan um sual ti maw? An thih hnu ahcun dawt kan duhtuk hna zongah san atlai ti lo. Cucaah an theisen le an nunnak dihlak in a kan dawtu kan nulepa hi an damlio te ah fale nih kan sikhawh chungin kan dawt ve hna awk asi timi hi tuanbia nih akan cawnpiak.

Note : Hi tuanbia attial tu ka thei ti lo, keimah ttial mi cu asi lo. Hmanthlak khi google ah kan lak mi asi.